Taylor Swift concert-ah Matty Healy; Speak Now (Taylor's Version) album kan hmu dawn!

An inkara thuthang ri ret ret a awm hnuah, The 1975 lead vocialist, Matt Healy chu Tennesse-a Taylor Swift concert-ah hmuh a ni a, hei hian an inkara meialh chu a rawn chhem nung thar leh ṭan.

An pahnih hian kum 2014 khan sawizawm an lo ni tawh a, mahse Healy erawhin an inkar hi a pha thung. Swift leh Healy te hi ṭhian angin an inkawm zui a, an collaborator atan Grammy-winning producer Jack Antonoff an hman ve ve avangin inzawmna thuk tak an nei ngei tih a lang.

Dating rumour hi kum ruk chhung a lo zui tawh Joe Alwyn nen an inṭhen aṭanga kar rei lote hnuah a rawn darh zui a, an inṭhen chhan hi an mizia inan loh vang niin thuchhuah an siam.

Hetih lai hian, Healy hi zaithiam FKA Twigs nen kum thum dawn an inzui hnuah kum 2022 khan an inkar hi an titawp a, a hmain model chhe lo tak Gabriella Brooks nen kum 2015-2019 inkar khan an lo inzui tawh bawk. The 1975 hian Australia leh Asia khawmualpuiah 'Being Funny in a Foreign Language' tour hlawhtling tak an nei zo deuh chiah a ni.

January thla khan, Swift hian London-a O2 Arena-ah an Healy-te band concert vawi hnih lai a lo chhim tawh bawk a, fans te chu rawn ṭhawng deuh thutin Midnights album-a a hla ṭhenkhatte leh , The 1975 "The City" pawh a perform nghe nghe.

Speak Now (Taylor's Version) ngaithla turin inring ang

Taylor Swift chuan a album hlui a re-record na tur 'Speak Now (Taylor's Version)' chu July 7 hian a tlangzarh dawn tih Nashville-a concert a neih ṭumin a sawi.

'Speak Now' album hi October 25, 2010 khan Taylor Swift hian Big Machine Records kaltlangin a tlangzarh tawh a, kum 2 chhung chu he album ziah nan hian hun hmangin midang puihna tel loa a kutkawih liau liaua a phuahte an ni. Swift hi he album-a hlate a phuah lai hian kum 18 - kum 20 inkar a ni.

Taylor hian a music career hi Big Machine Records aṭangin a ṭan chho a, Big Machine chhuahsanin kum 2018 khan Republic Records a zawm leh. A label hlui Big Machine-ah hian a album hmasa parukte an awm vek avangin, Big Machine neitu thar Scooter Braun a'n label a lei hnu ah Taylor album hlui te hi a 'master' sak vek. Hei vang hian Taylor leh Scooter inkarah buaina a chhuah phah hial a, Taylor hian a album hluite nei kir turin album paruk te hi re-record leh vek a tum thu a puang.

Fearless (Taylor's Version) leh Red (Taylor's Version) te kan hmu tawh a, tunah chuan Speak Now chu a project pathumna a nih thu a puang zui leh ta a ni.