THULKHUNG APPS TLANGZARH DAWN!

Music Domain Mizoram chuan zai mite tana hamṭhatna, sum lakluhna ngialnghet tak an neih theihna atan leh, Mizoram-a film producer-ten hlawk lehzuala an film siamte hmanga sum an hmuh theihna tur, hacking laka security ṭha tak Thulkhung Application thar an siam chhuak ta rup mai.

Thulkhung Apps tlangzarh inkhawm hi naktuk, May 9, 2023 (Thawhlehni) zan dar 8:00 hian Music Home, Zonuamah neih a ni dawn.

He Apps tharah hian hla hlui leh hla thar (Audio), Music Video, Film leh Music kaihhnawih chi hrang hrang dah a ni dawn. Zaii Hauchhum, David Darlong, Jenny Zathang-te Music Video thar en tur a awm nghal dawn bakah, tunlaia Mizo Film lar tak 'BLACK ROSE' film chu lei theihin dah chhuah a ni bawk ang.

THULKHUNG Apps hian Mizo zaithiam leh music lama tuite'n pawisa tam tak senga siam, an hla tharte a thlawna en mai theiha an pho chhuah ṭhin chu mipuite hnenah man tlawm te a lei theih turin a pho chhuak ve thei tawh dawn a, zaimite leh rimawi lama tui mite tan nasa takin bung thar a kaitir dawn a ni. Hei bakah hian film siamtute tan pawh an film siamte HACK awm lo thei ang ber turin security ṭha tak nena duangin a rawn chhawp chhuak dawn bawk.

MIPUITE HNENA NGENNA:

MDM chuan mipuite hnena ngenna siamin, kan lungngaih lai leh mangan lai min hnem tur leh, kan hlimna leh lawmna tizual tura an hla ṭha tak tak a thlawn veka rawn pho chhuak ṭhinte tan hian in sen hreh lo a, man tlawm te tea an zawrhte leisak a, duhsak let ve turin a ngen. Rs 30 vel leka kan lo leisak tlingkhawm chu artistt-ten chhungkua chaawmna atante an lo hmang thei tih hriatsak turin a ngen a ni.