Science & Environment: Ni 276 hnuah reusable Chinese Spacecraft khawvelah a rawn let

Chinese spacecraft chuan ni 276 chhung orbit-a hun a hman hnuah nimin khan mak tak maiin kan chenna khawvel a rawn ṭum thleng tih China state media chuan tarlangin, an ramin space technology hman nawn theih chi (reusable) chu hlawhtling taka kalpuiin mellung pawimawh tak an phun.

He spacecraft-ah hian mihring an chuang lo a, khawl hmanga thunun a ni. Spacecraft hian nimin khan China hmarthlang lama Jiuquan launch centre-ah ruahman lawk angin tluang takin a rawn ṭum thleng a ni.

Spacecraft chungchang hi chipchiar taka puanzar a awm lo a, eng technology nge an hman emaw, eng tianga sang nge a thlawh thlen tih emaw puan a awm lo. August 2022-a kahchhuah a nih khan khawi orbit-ah nge a tlak tih sawilan a ni lo a, craft thlalak pawh hi mipui hmuhah pholan a la ni lo bawk.

He enchhinna hi China researcher-te tan kawng thui tak sialsaktu a ni thei dawn a, spacecraft technology hmannawn theih chi hmang ngei hian space missions lo awm zel turte tan pawh senso hautak lo zawk, leh awlsam zawk a hrinchhuah ngei an beisei tih state media chuan a tarlang.

Kum 2021 khan, tuna spacecraft an kahchhuah ang tak hi space hmawrah thlawkin, an kahchhuah ni vek hian kan chenna leilungah a rawn let leh nghal. He thil thleng hi zep tum viau mah se media lamah a darh leh tak avangin a hnuah a khamphei zawngin a rawn tlak thu a hunlaia China main space contractor-te chuan an sawi.

China social media thulengvak ṭhenkhat chuan Beijing hian kum tam tak chhung orbit-a cham tawh U.S. Air Force X-37B khawl ang tak an siam tih an tarlang.

Mihring chuan lohna leh hmannawn theih- X-37B hi nikum November thla khan a mission vawi rukna leh a hnuhnung ber chu zo felin kan chenna leilung a rawn thleng a, orbit-ah hian ni 900 chhung zet a han cham a ni.