Guardians of the Galaxy film hnuhnung ber a che ṭha

Marvel Comics superhero team inkawp rem tak, Guardians of the Galaxy film pathumna leh a hnuhnung ber ni bawk chu beisei ang ngeiin kar liam ta chhung khan Box office-ah a che ṭha ber.

He trilogy film ziaktu leh director hi The Suicide Squad (2021) lama a kuthnu kan lo hmuh tawh, James Gunn niin ṭum danga kan lo hmuh tawh ṭhin lemchanthiam ṭha rual - Chris Pratt, Zoe Saldaña, Dave Bautista, Karen Gillan, Vin Diesel, Bradley Cooper, Sean Gunn, leh Sylvester Stallone-te aw leh chetla lai hmuh theihin a awm a ni.

Film hmasa pahnih en tawhte'n a hmuhnawm zia an hrechiang a, la en lo te tan, action leh humor ngaina mi i nih chuan hmaih phal chi a ni lo ang

USD mtd 100 a ṭha tawk lo maw?

Eng film tan pawh tlangzarh kar bikah USD mtd 100 chuang lakluh hi hlawhtlinna lian tak a ni a, mahse Guardians of the Galaxy siamtute tan erawh lawma han zuan tawr tawrna chi a ni lem lo.

Kum 2017-a tlangzarh 'GOTG Vol 2' khan tlangzarh kar khan USD mtd 146 lai a lalut thei a, hei vang hian film hmasa aṭanga teh chuan a hlawhtling tawk lo a, hnungtawlh zawngin an kal a tih theih awm e.

Hetih lai hian, GOTG film hmasa ber kum 2014-a tihchhuah khan USD mtd 94 lalutin, hei erawh a film bulṭanna a nih avangin tehfunga hman a fuh ber lo thung ang. GOTG film pathum zingah Rotten Tomatoes critics score a hmu hniam ber a, ratings 7.2/10 a hmu a ni.

May thlaa Disney Marvel movie tihchhuah zingah tlangzarh kara sum lalut tlem ber a ni mek a, kum khat vel liam ta khan "Doctor Strange in the Multiverse of Madness" chuan USD mtd 187 a lalut tawh a ni. A hlawhtlinna sawi nep chi erawh a ni hauh lo. Khawvel hmun hrang hranga market 52-ah pakhatna dinhmun a hauh fai vek a, heng aṭang hian USD mtd 168.1 lalutin a sum lakluh belhkhawm hi USD mtd 282.1 a tling tawh a ni.

Super Mario nek thlakin a awm ve ta

Box office-ah thla khat dawn a chung bera a cham hnuah Super Mario chuan nekthlaktu a nei ve ta. Hun rei loe chhunga USD tld 1 chuang lalut tling thei film hi kumina sum hailut hnem ber ni turin dinhmun ṭha takah a ding mek.

"Evil Dead Rise" pawh a hrang tak tak thei lo a, pathumnaah a tla thla.

"Are You There God? It's Me, Margaret." chuan USD mtd 3.4 nen bul a rawn ṭan a, Keanu Reeves channa "John Wick: Chapter 4" leh franchise film hnuhnung ber tur nia an sawi chuan top 5 a rawn khar a ni.