The Weeknd-a'n album a tihchhuah rualin a stagename thlauhthla dawn

Canadian singer/songwriter The Weeknd chuan tunlai hian a album hnuhnung ber tur a buaipui mek a, a stagename a lo hmingthanpui tawh chu album a tihchhuah rual hian kalsan a tum thu a sawi zui a, The Weeknd hnuhnung ber kan hmuhna tur a nih ngei hmel.

Kum 33 mi zaithiam chuan a puala HBO series "The Idol" promote tura W Magazine-in an kawmnaah a hming, a lo larpui tawh chu kalsan a tum thu sawiin, "Tuna ka album tihchhuah tur hi The Weeknd hming pua ka zai tawpna tur a ni ang. The Weeknd ka nihna ang chuan ka tihtur ka hlen tawhin ka hria," a ti.

Bella Hadid leh Selena Gomez tawih hlui chuan a rilru lamah kawng harsa tak a zawh chhoh lai a nih thu tarlangin, The Weeknd zinkawng chu khar turin a hmun leh hun diktakah ka awm mek a ni, a ti.

The Weeknd, a hming tak - Abel Makkonen Tesfaye chuan film leh television lamah a rilru tam zawk a sawrbing ṭan mek a, heti chung hian rimawi chawlhsan tumna a neih loh thu leh, Abel hming pu ang pawha hla thar a tihchhuah mai theih thu a sawi. "Ka theihtawp ka la chhuah reng tho a, engkim hi risk vek a ni chungin keimaha theihna ṭha ber ka pek miau avangin show hmuhnawm tak a niin ka hmu," tiin a hnaah a lungawi thu a sawi.

The Weeknd channa "The Idol"-ah hian Johnny Depp-a fanu Lily-Rose Depp nen an chang dun a, May 23-ah tlangzarh tura tih a ni. June 4 aṭangin HBO lamah pekchhuah a ni thung ang.