Zai mite hamṭhatna tur THULKHUNG app tlangzarh a ni ta
Music Domain Mizoram (MDM)-in zai mite hamṭhatna tur, sum lakluhna ngialnghet tak an neih theihna atan leh, Mizoram-a film producer-ten hlawk lehzuala an film siam hmanga sum an hmuh theihna tur, hacking laka security ṭha taka thuam 'Thulkhung' Application a siam chu chief minister Zoramthanga chuan Thawhlehni zan khan a tlangzarh.
App tlangzarhtu CM Zoramthanga chuan, "Thulkhung apps chu zai mite tan mai ni lo, Zo hnahthlak tawh phawt tan a la hlu hle ang," tiin, mipuite pawhin zai mite duhsak a, a thlawn ringawt a an hlate neih tum lo a, an lo din khawchhuahna tur platform ṭha tak lo awm hmanga zaithiam kan tihte tana luang chhuak ve turin a sawm. "Application ṭha tak tunlai mila siam chhuah a lo ni ta hi a lawmawm hle a, Zoram mipuiten ṭangkai taka hlawkna atana hmang ṭheuh turin mipuite ka ngen a che u," a ti.
Thulkhung application-ah hian tunlai zaithiam lar - Zaii Hauchhum, David Darlong, Zorinzuali Khiangte leh Jenny Zathang-te Music video; tuma la en loh leh hmuh ngai loh chu lei theih turin an rawn chhawpchhuak nghal a ni. Heng music video-te hi Youtube emaw, apps dangah emaw hmuh tur a awm dawn lo a, Thulkhung apps-ah bak dah chhuah a nih dawn loh avangin anmahni ngainatu leh an music video hmuhnawm tak takte en duh chuan www.thulkhung.com ah application download-in, mahni phone-a Thulkhung apps player chhawm changkang tak hmangin i duh hun hunah a ngaihthlak veng veng theih tawh dawn a ni.
'Thulkhung' ah Zaii Hauchhum hla thar
Tunlai hmeichhe lengzem singer huhang ngah tak, Zaii hauchhum hlaphuah 'Kar hla thin mah se' music video changkang leh nalh tak chu ngaihthlak theihin a awm.
David Darlong pawhin ama hla phuah liau liau 'Min tiam rawh' tih hla mawi tak mai a dah bawk a, Zorinzuali Khiangte chuan '90's hmangaihna' tih hla dah thar bawkin Jenny Zathang hian 'Vengtu Angel' tih hla thinlung khawih tak leh music video changkang tak a rawn dah bawk a ni.
Hei bakah hian tunlai Mizo film hit tak 'Black Rose' chu man man takin chhawpchhuah a ni bawk.
Heng music video-te hi Rs 30 chauh sengin a ngaihthlak theih dawn a, a thlawna ngaihthlak theih a awm nual bawk a, hla ṭhenkhat pawh Rs 5 man lek te pawh a awm bawk.
Apps-ah zaimi leh music lama tuite tan dah man awm dawn lo
Thulkhung apps-ah hian zaimi leh music lama tui te tan pawh dah man chawi a ngai dawn loh bakah, buaipui ngai awm loin dah zel theih a ni. Film thar siam mekte pawhin percent ṭha tak nei turin film a dah theih bawk. He Thulkhung hi a duh leh hmang ṭangkai duh apiangte tan malsawmna a nih ngei an beisei tih app siamtute chuan an sawi.
