Twitter-a Celeb-te account hack-tu thiam loh chantir

Khawvel huap milar hrang hrangte Twitter account khawihchingpensak a, cryptocurrency USD 7,94,000 chuang ruksaktu British mi Joseph James O'Connor (23) chu Thawhlehni khan New York court chuan thiam loh a chantir.

Celebrity Hacker an tih mai, Joseph hian US president hlui Barack Obama leh Twitter CEO Elon Musk-te account a hack-sak niin an sawi a, kum hnih liam ta khan July 2020-a milarte Twitter account 130 chuang a hack-sak avangin Spain-ah man a lo ni tawh bawk a ni. Hemi ṭum hian Apple, Uber, Kanye West, Bill Gates, Joe Biden, Obama leh Musk-te account a khawihsak niin an sawi.

Joseph leh a hacking group rualte chuan celebrity-te account hmangin an followers-te chu bitcoin thawn tur leh, an rawn thawn let pek kir an intiam a ni.

Kum 2019 khan 'sim card swap' technique an tih hmangin TikTok star Addison Rae leh actress Bella Thorne-te social media account lo hack-sak tawh bawkin, an mimal thlalak leh thuruk pholanah an lo vau tawh nghe nghe a ni.

He technique hmang vek hian New York-a cryptocurrency company aṭangin virtual currency USD 7,94,000 an lo ruksak tawh bawk.

Joseph O'Connor hi PlugwalkJoe tihin online lamah a indah a, a pawikhawihna heng - computer intrusion, extortion, stalking, wire fraud leh money laundering vangin court chuan thubuai eng emaw zat a awrhtir a ni.

July 2021 khan an hacking group-a an thluakbur ber, Florida-a cheng Graham Ivan Clark (17) chu kum a la tlin loh avangin naupang jail-ah Florida-a Youthful Offender Act hnuaia hremna sang ber pek niin, kum thum tang tura hrem a ni.