DMZP-in DU-a zir tumte tan thurawn an tichhuak

Delhi Mizo Zirlai Pawl (DMZP) chuan Delhi University (DU) hnuaia college hrang hranga admission kalpuina atan Common University Entrance Test (CUET) hman a nih hnuah, DU-a admission tih tumten Mizo zirlaiten harsatna an tawh ṭhin avangin, Mizo zirlaite tan thurawn a tichhuak.

DU hnuaia undergraduate (Bachelor) course zir tumte chu Class XII-a an subject exam-ah chauh CUET (UG) ah exam an pe thei tih a ni a, CUET-a subject offer loh exam chuan a ang teuh ber (similar/close related subject) an exam tur tih a ni. Mizoramah Education leh Public Administration subject la an awm nual a, mahse heng subject pahnih hi Domain Specific Subject 27-ah telh a nih loh avangin, Delhi University-a luh tumte chuan entrace test-ah subject dang an exam a ngai dawn a, hei hi lo hre turin zirlaite an chah. Public Administration aiah Political Science leh, Education aiah Teaching Aptitude exam tur a ni. Kum hmasa lamahte heng subject laten Delhi University-a admission tih an tum laia harsatna an tawh avangin, zirlai kal thar turten an tihsual ve loh nana puanzar chu DMZP chuan a ṭulin an hria a, thurawn anga ngaihsak turin an ngen bawk.

DMZP hian Delhi-a admission tih tum zirlaite puihna tur hian DMZP Admission Help Desk an siam ṭhin a ni.