Rimawi khawvelah 30 Seconds to Mars an lo let

American rock band hmingthang tak ni ṭhin, 30 Seconds to Mars chu kum nga hnuah music thar nen an lo let leh ta.

An frontman Jared Leto chu Met Gala-a fashion designer fam ta, Karl Lagerfeld-a zawhte duat tak lema a rawn inlan hnuah, a unaupa Shannon Leto nen hla thar 'Stuck' an tihchhuah tur thu an puang zui a, tunah chuan ngaihthlak theihin an chhawpchhuak tawh a ni.

Band hian kum 2018-a an tihchhuah "America"hnuah thawm an rawn nei zui lo a, an band guitarist Tomo Milicevic-a'n a chhuahsan zui bawk a ni. Hemi hnuah Jared hi lemchan khawvelah a buai zui hle a, "House of Gucci", "Zack Snyder's Justice League", "The Little Things", leh "Haunted Mansion"-ahte inlanin, "Tron 3", leh "Adrift"pawh inlan tura tih a ni. Mahse, Covid-19 hrileng vanga khawvel a inkharkhip lai khan an unauin hun rei tak an inkhung hran hnuah hla 200 vel an phuah hman tih a sawi.

Jared chuan rimawi lamah luh thuk lutuk an tum loh thu sawi zuiin,"Album tihchhuah hi kan hmanhmawh lem lo a, rimawi hi kan chawlhsan hlen dawn tihna lam ni lo mah se, tuna kan tihchhuah bak hi chu a chhuak leh mai tawh lo ang,"tiin hla ṭha tak tak a neih hma loh chu chawlhsan zui mai pawi a tih loh thu a sawi.