BTS-in anmahni pualin lehkhabu tlangzarh dawn

BTS chuan tun nipui hian anmahni pualin lehkhabu an tlangzarh dawn tih official-in an puang chiang ta!

Kum 10 liam ta chhunga an hun hman dan, khawvel huapa rimawi dawhsan an chuan kai dan, an hlawhtlinna chan chhoh dan hrang hrangte chu chu journalist, Myeongseok Kang puihna hmangin thuah chantirin, a lehkhabu hmingah, "Beyond The Story: 10-Year Record of BTS" phuah a ni. Kumin July 9 (BTS fandom, ARMY din ṭan ni) hian South Korea leh United States-ahte zawrhchhuah ṭan a ni ang.

Kar liam ta aṭang khan khawvel huapa pop star lar takin lehkhabu a tlangzarh dawn niin titi lengvak a tam hle a, tu ber nge tia an in rinsiak luai luai hnuah, US-a bookseller-te beng pawh thleng chho ve lehin, Taylor Swift chu an hmehbel ber a ni nghal. Lehkhabu zuarchhuaktu lian pahnih - Amazon leh Barnes & Noble pawhin zawhna an dawng hnem hman hle a ni.

Mahse, Thawhlehni a lo inherchhuah leh meuh chuan U.S. publisher Flatiron Books chuan official-a thuchhuah siamin, he thuruk phena lehkhabu tlangzarh tu tur chu South Korean boy band hlawhtling ber BTS an nih thu an puang zui. Ngaihven a hlawh nghal dan aṭangin kar loah copy maktaduai chuang hralh an harsat dawn loh tih a chiang nghal hle.

New York Times tarlan danin, US edition lehkhabu bik hi phek 544 a chhah a ni dawn a, thlalak ngaihhlut bik eng emaw zat zeh tel a ni ang a, English ṭawnga lettu hi Anton Hur, Clare Richards leh Slin Jung ṭangkawpin an buatsaih a ni.

Ala hre lo te tan

Kum 2013-a BTS din hnuah, boy band hian album pakua leh EP paruk an tichhuak tawh a, Asia rama inhuatna leh diriamna dodalna kawngah an thawhhlawk hle. Kum 2018 khan an album 'Love Yourself: Tear' hmangin K-pop act zingah Billboard album chart-a pakhatna dinhmun hauh thei hmasa ber an ni.

Rimawi lama chawimawina ngaihhlut Grammy-ah nomination ṭum nga an hmu tawh a, K-pop act zingah hetiang dinhmun thleng thei hi tun thlengin an la awm lo. Nikum khan an mimal project ṭheuh buaipui tur leh, mandatory military service an zawm a ngaih avangin chawlhlailawk an puang. Jin chu sipaiah ṭang hmasa berin, J-Hope chuan a rawn zui ve leh a, member dangte pawhin an la zawm ve leh thuai a ngai dawn a ni.