Phone call hmang nasa te'n High Blood Pressure an neih theihna 12% in a sang : Study

European Society of Cardiology (ESC) hnuaia European Heart Journal - Digital Health in a tarlan danin, kar khat chhunga minute 30 aia rei phone hmanga mi be ṭhinte chuan high blood pressure (BP sang/hypertension) an neih theihna chance 12% velin a sang.

"Miin phone a hun a hman rei poh leh lung (heart) natna a neih theihna a sang a ni," tiin Southern Medical University, Guangzhou, China-a an study author Professor Xianhui Qin chuan a sawi a, an thil zirchhuahte nemnghehnan zirchianna thuk zawk kalpui zel pawh an tum thu a sawi.

Khawvel huapa kum 10 chin leh a hnuailam hmun lia ṭhena hmun thumten mobile phone an hmang mek a, puitling tld 1.3 zinga kum 30-79 inkarte chuan high blood pressure (hypertension) an nei mek bawk. Hypertension hi heart attack leh stroke thlentu zinga mi niin, kum khat chhunga a hunloa thihna thlentu tam ber a ni. Mobile phone-te hian radio frequency energy level hniam tak an pechhuak a, mahse phone hman nasat chuan BP sang kan neih theihna chance a tisang a ni.

Zirchianna hi UK Biobank kaltlangin puitling 2,12,046 kum 37-39 inkarah neih a ni. Heng zingah hian BP sang nei sa ni lem lo mi eng emaw zat an tel a, mipuite chu kum eng zat nge phone an hman tawh tih te, kar khata darkar an hman zat, leh mi an biakin hands-free device/speaker-ah an dah ṭhin em tih questionnaire hmangin zirchianna hi neih a ni.

Researcher-te chuan mobile phone hmangtute kum, sex, body mass index, hnam bil, education, chhungkuaa hypertension neih dan, mei zu mi, blood lipid, blood glucose, kidney function leh an damdawi ei dan a zir leh, cholesterol hniam emaw blood glucose level thlengin uluk takin an zirchiang.

Participant-te kum chawhrual hi 54 a ni a, 62% chu hmeichhia niin chung zinga 88% chu mobile phone hmang ṭhin an ni. Kum 12 chhung an hun hman dan an thlir let hnuin, mi 13,984 (7%) chuan hypertension an nei. Mobile phone hmang ṭhinte chuan phone hmang ngai lo te aiin hypertension neih theihna 7% in a sang zawk a, minute 30 aia rei phone call hmang ṭhinte chuan high blood pressure an neih theihna 12% in a sang zawk tih an sawi.

Professor Qin chuan "Kar khatah darkar chanve aia tlem phone call nei ṭhinte chuan high blood pressure an neih theihna a tlem tih kan hmuchhuak. He result hi chiang zawk ennawn leh a ngai ang, mahse thil chiang tak erawh chu lung hrisel tak neih kan duh chuan phone aṭanga mi kan biak tlem a pawimawh," a ti.