MTV 2020 VMA-ah BTS, Doja Cat leh J Balvin-te an perform dawn
Kumin August 30-a sem tur, MTV 2020 Video Music Award (VMA) sem turah tunlaia music lama huhang ngah tak Doja Cat leh J Balvin-te bakah BTS chu an perform dawn.
K-pop band BTS hi VMA-ah hian an vawi khat zaina tur a ni a, award sem tuk August 21-ah hian an hla thar 'Dynamite' tih chu fan-te ngaihthlak theihin tihchuah an tum bawk. Nikum khan south korean boy band BTS (RM, Jin, Suga, j-hope, Jimin, V leh Jung Kook) hian VMA-ah hian nomination panga lai an hmu a, Best K-Pop leh Best Group award an la.
VMA sem turah hian BTS chuan Best Choreography, Best Pop Video leh Best K-Pop-ah nomination an hmu leh bawk. Perform tur zinga mi Colombian singer J Balvin chuan nomination pali laiah a hmu ve a, American singer leh rapper kum 24 mi Doja Cat hian song of the year category-ah nomination a hmu a, he category-ah a a el pui turte hi Billie Eilish, Post Malone, Lady Gaga leh Ariana Grande-te an ni nawk.
Lady Gaga leh Ariana Grande-te chu nomination hmu hnem an ni a, anni hian category pakuaah nomination an hmu. An dawtah hian Billie Eilish leh The Weeknd an awm a, anni hian category paruk laiah nomination an hmu ve bawk.
Award ngaihhlut Artist of the Year category-ah chuan Justin Bieber, DaBaby, Lady Gaga, Megan Thee Stallion, Post Malone leh The Weeknd an awm a, he category hi a ngaihnawm dawn. Justin Bieber hian tunhma angin huhang rawn ngah vak tawh lo mah se VMA-ah hian a mikhual lo hle a, kum 16 mi chauh niin VMA award la thei naupang ber a ni. MTV 2020 Video Music Award hi New York, Brooklyn-a Barclays Center neih tum a ni a, kum 1984 aṭang khan he award hi sem a lo ni tawh a ni.