Twitter CEO thar - Linda Yaccarino

Elon Musk chuan a company Twitter-a thuneitu thar, CEO atan Linda Yaccarino a ruat.

Nikum October thlaa USD tluklehdingawn 44 zetaTwitter a lei hnuah, Musk chuan amah thlaktu tur hi kar hmasa Zirtawpni khan a puang a ni.

Yaccarino pawhin a hna tharah a phur tawh thu tweet nghalin, "Elon Musk-a hmathlir thui tak hian phurna nasa tak mi pe a, hmabak engzawk nen he social media platform hi bung thar kaipui ka chak tawh hle," a ti.

Yaccarino hian Comcast Corp's NBCUniversal-ah advertising chief kum eng emaw zat lo chelh tawhin, site changkang zawk Twitter 2.0 siam turin hmalakna an kalpui nghal tur thu a sawi.

Twitter CEO hian an social media platform-a ad revenue tlahniam mek te leh, thawktu paih ṭhen chungchangahte thutlukna harsa tak tak a siam chhoh a ngai dawn a ni.

Musk-a'n Twitter-a thuneitu ber nihna a chelh aṭangin advertiser tam zawk chuan platform hi an chhuahsan tawh a, company-a thawktu 80% dawn ban an nih avangin an ads content lamah hlauhthawnna lian tak an neih avanga chhuahsan an nih thu an sawi. Musk pawhin ad revenue-ah nasa taka an tlakhniam thu hi pha lem lo.

Musk hian kumin kumtir aṭang khan Twitter enkawltu tur hi a lo zawng tawh a, tunah chuan a company hmalam pan pui thei awm ang mi a hmu ta. Musk chuan Yaccarino hian app kaltlanga engkim tih theihna "everything app" siam kawngah a pui dawn tih sawiin, peer-to-peer payments leh digital ads-ah inthlurbing an tum thu an sawi.

Musk hi electric-vehicle siamchhuaktu lar Tesla Inc hotupa a ni mek bawk a, Twitter-a Yaccarino lakluh a nih tak avangin Tesla-ah rilru a sawrbing theih phah dawn tih a sawizui bawk a ni.