Parineeti Chopra leh Raghav Chadha an inhual; “Ka ṭawngṭai chhanna” - Parineeti

Lemchanthiam Parineeti Chopra leh ram pum huapa politician lar, AAP MP Raghav Chadha-te chu Inrinni kalta khan Delhi-ah sawmbikte hmaah an inhual.

Parineeti leh Raghava te hian an inngaihzawn thu hi an puangzar ngai lem lo a, mahse kumtir lam khan Mumbai-a an chhuakdun lai hmuh an nih tak fo avangin rinhlelh an kai ṭan a, thla tam a liam hmain an inhual thu an puang zui leh ta a ni.

Parineeti chuan Instagram-ah an thlalakte hi rawn pholangin, thuthang chu thutakah a rawn chantir ta a, "Ka ṭawngṭai chhanna zawng zawng...Aw ka ti ta!," tiin caption-ah a suangtuahna tihpuitlina a awm chu a lawmzia a rawn tarlang. He engagement ceremony hi Punjab CM Bhagwant Mann, Priyanka Chopra, Manish Malhotra, Derek O’Brien, Abhishek Manu Singhvi bakah entertainment leh politics huanga mi challang tak tak te'n an hmanpui bawk.

Parineeti leh Raghav-te inneih hun tur hi puanzar a la awm lo a, anmahni hna ṭul buaipui hmasak phawt an tum thu leh, kumin kumtawp lam an tinzawn thu an tarlang.