Khiangte Construction Ṭhazual Gospel: Puipuia Chhakchhuak "Thlarau Rosepar" a par mawi ber

Kum naupangte ni chunga Mizo Idol top 5 lai inhlangkai thei, Thawhlehnaniropuia (Puipuia Chhakchhuak) chuan Rosangliana (Zorock) hla phuah mawi tak, 'Thlarau rose par' hmangin chart chung ber a rawn luah ve leh ta.

Puipuia a la thiam reng

Kum 2015 khan Puipuia hi Mizo Idol-ah telin, pakhatna dinhmun chu luah pha chiah lo mah se, intihsiak chhung zawnga contestant tam tak kara mi en bik a ni a, top 5 lai rawn inhlangkai theiin, a zaithiam piah lamah a chevel a hmuhnawm ṭhin avangin a naupanna ngaihnep theih a ni lo. Kum tam a vei hnuah hla eng emaw zat tichhuak tawhin, tunah Mizo zinga hla phuah thiam ber pawl tiha chhal ngam, Rosangliana (Zorock) a hla phuah ngei mai hmangin pakhatna dinhmun a rawn hauh leh thei ta a ni.

Music hi Thangbawiha (EME Records) kutchhuak a ni a, Recording hi HC Recording-ah tih niin, video hi Tea Chhakchhuak chuan mawi takin a shoot sak bawk.

Angaihi Fanai leh One in Christ

Mizo Idol season 7-a top 5, Angaihi Fanai chuan a MV hmasa ber, Vanlalsailova hlaphuah, "I lamah a ṭang Lalpa" a cover-na hmangin pahnihna a rawn chuangkai tawh a, Gospel band ṭha ber pawl One In Christ chuan "Min ngaithla la" chu pathumnaah rawn lanpui bawkin, chart thar berah pawh dinhmun sang bera rawn inhlangkai thei an ni ve ve e.

Chart-a hla te an mawi...

Seraphic Choir 'Thisen hlu' chu palinaah awmin, Vanlalneihpuii chuan 'I siamtu hre reng rawh' tih hla mawi tak hmangin top 5 a rawn khar.

Stacy VL Muanpuii, Omomi Khiangte, Arini Ralte & Zorinsanga Sailo, K. Lalremmawia, leh Melody Lalzirliani-te chu chart a lang dangte an ni a, tunkar chart topper-te hla hi a mawiin belhchian an dawl hlawm hle a ni.