BAFTA TV Awards 2023: 'DAHMER' leh Kate Winslet tan zan chhinchhiahtlak

16th May, 2023

Kum liam ta chhunga British television huanga cheṭha zualte chawimawina hun, British Academy Television Awards chu an ram huna Pathianni zan khan Royal Festival Hall, London-ah neih a ni a, Netflix series hit tak, American serial killer Jeffrey Dahmer chanchin "DAHMER - Monster: The Jeffrey Dahmer Story" bakah, Kate Winslet, Ben Whishaw-te tan zan chhinchhiah tlak tak a thleng .

Kate hian "I Am Ruth" vangin Leading Actress award a la a, "This Is Going to Hurt" lead actor Ben Whishaw chuan Leading Actor award a dawng ve bawk.

Ryan Murphy kutchhuak, "DAHMER - Monster: The Jeffrey Dahmer Story" hnenah International award hlan a ni a, Evan Peters channa series hian inhnialna pawh chawkchhuak viau mah se, tualthattu nunrawng tak chanchin hian mipui hlut a hlawh hle.

British-Somali long distance runner Mo Farah documentary ngaihnawm tak,"The Real Mo Farah" chuan best documentary a hum haw a, BBC game show "The Traitors" chuan award pahnih a humhaw bawk a ni.