Vin Diesel nen an inhmuhthiam lohna karah 'Fast X'-ah The Rock rawn inlan!

Dominic Torretto-a'n "I chhungten an phatsan che pawn, i phatsan ve tur a ni lo," tiha a sawi chu Dwayne "The Rock" Johnson bengah a la cham reng niin a lang. Vin Diesel nena an inkarah inhmuhthiam lohna a awm tiha an sawi hnuah pawh "Fast and Furious" franchise "Fast X"-ah rawn inlan dawn tih report thar ber chuan a tarlang.

TheWrap-in a tarlan danin, The Rock hian May 19-a theatre lama tlangzarh tur 'FAST X'-ah hian a inlan dawn tih an tarlang. Film siamtu Universal Pictures thupuangtu erawhin thuchhuah an la siam lo a, engtia hmin thei nge tih zawhna an dawn pawh an chhang lo.

November 2021 khan, Diesel chuan "The Fate of the Furious" shooting an neih laiin The Rock nen an intihbuai thu a tarlang, mahse tunah erawh an inkar hi a ṭha tawh niin a lang a, IG kaltlanga post a siamah, "Ka nau Dwanye..a hun a lo thleng ta. Fast 10 hnuhnung berah role pawimawh tak hlenchhuah tur i neih avangin franchise hi chhuahsan suh ang che," tiin ngenna angreng tak a siam zui bawk.

Hetih lai hian Zirtawpnia tihchhuah tur, "Fast X" hi franchise film hnuhnung ber dawttu ni tura sawirik mek a ni. Diesel bakah Michelle Rodriguez, Tyrese Gibson, Ludacris, Jordana Brewster leh John Cena-te chuan role pawimawh tak an la chhunzawm leh dawn a, Aquaman star Jason Momoa chu misualpa ber a ni thung ang.