Nepal Sherpa-in Mount Everest vawi 26 a lawnchhuak; Khawvela tithei pahnihna a ni bawk

Nepali sherpa guide, Pasang Dawa Sherpa chuan Pathianni khan a vawi 26-na atan khawvela tlang sang ber, Mount Everest a lawn chhuak niin hiking official-te chuan an sawi a, khawvelah hetiang zat lawnchhuak thei pahnihna a ni bawk.

Kum 41 mi hian meter 8,849 (29,032ft)-a sang, Mt Everest lawnchhuak tam record chelhlai Kami Rita Sherpa chu a nihrual ta chiah tih sorkara tourism official-te chuan an sawi. Kami Rita hi tunah hian Everest a lawn leh mek a, a lawnchhuak leh thei a nih chuan a vawi 27 lawnchhuahna tur niin, record thar a siam leh dawn tihna a ni.

Sherpa-te hi tlang an lawn thiam niin, ram pawn aṭanga khualzin rawn kalte tlang sang tak tak fanpui a, hruai kual chu an eizawnna bul ber a ni.

Pakistan hmeichhia, Naila Kian chu kumina climbing season, March - May chhunga rampawn mi Everest lawnchhuak hmasa ber a ni.

Nepal chuan kumin hian tlang sang ber lawn phalna, permit 467 an pechhuak tawh. Everest hi Sir Edmund Hillary leh Sherpa Tenzing Norgay te'n kum 1953-a an lawnchhuah hnuah, mi 11,000 chuangin tlangchhip hi an thleng tawh a, mi 300 chuangin tlang an lawnna lamah an nunna an chan phah niin Himalayan database leh Nepali official-te chuan an tarlang.