Ed Sheeran la tluk loh Morgan Wallen

Morgan Wallen studio album pathumna "One Thing at a Time" chu khawih chet zawh rual a la ni lo a, country music lal thar hian a zawnin kar 10 chhung rorelna lallukhum hi a khum tawh a, Ed Sheeran album thar "subtract" meuh pawhin a la tukdawl zo lo.

A awmchhun leh a hmasa ber

Wallen album hian equivalent unit 1,41,000 chuang zet hmuchhuakin a chung ber a luah leh ta a ni. Heti hian Wallen hi kum 1956-a Billboard 200 mumal taka kalpui a nih hnuah mipa soloist zinga kar 10 chhung No. 1 ni thei awmchhun leh hmasa ber a ni. Hetiang dinhmun chelh thei dangte chu - Adele, Whitney Houston, The Monkees leh The Kingston Trio-te chauh an ni.

2-naah "– (Subtract)"

Ed Sheeran album thar "– (Subtract)" chu pahnihnaah awmin, equivalent album unit 1,12,000 lai a hmuchhuak thei tho a, Wallen-a vanglai a tawng erawh a vanduai ti ila kan sawi sual lo ang. Eng artist tan pawh unit nuai 1 chuang hralhchhuah hi hlawhchhamnaa chhiar chi a ni lo ang.

Hei bakah, kum 2017 hnua British singer album hralh ṭhat ber niin, "Equal" leh "No. 6 Collaborations Project"-te a khum a ni.

Swift, SZA leh Wallen

Taylor Swift "Midnights" chuan kar hmasaa a dinhmun ngai rawn chelhin pathumnaah a rawn la inhamtang a, SZA "SOS" leh, Morgan Wallen-a'n kum 2021-a a tihchhuah "Dangerous: The Double Album" chu a rawn lang thar leh a, tihian top 5-ah a album pahnih lai lanpui theiin, mellung pawimawh tak a siam.

Hetih lai hian, K-Pop girl group ṭhangduang tak LE SSERAFIM chu a vawi khatna atan Billboard chart top 10 an rawn inhlangkai a, "Unforgiven" chuan parukna a rawn hauh. Bad Bunny-a'n hun rei tak chhung ro a lo rel tawhna "Un Verano Sin Ti" chu top 10-ah rawn lang thar lehin, Luke Combs "Gettin' Old" leh, Metro Boomin "Heroes & Villains" te'n a hnu an rawn khar zui ve bawk a ni.