Mizoramah hlawhtling tura beisei FRONZ an tlangzarh

GIG Motors chuan mipui tan an huang an zauh zelna tur a nih beiseiin, nimin khan Nexa Aizawl showroom, Ṭhuampuiah Maruti Suzuki car thar Fronz an tlangzarh.

Fiamthu lama kan mi bik, tunhnaia National Integrated Forum of Artists & Activists-in Super Human Award an hlan H Rotluanga'n Mizo mipui lei theih turin a khuh hawng a, hralh theih tura an lak chhuah sa pathum an pe chhuak nghal bawk.

Mizorama Maruti Suzuki car dealer, GIG Motors chief executive officer John Lalpeka chuan an car zawrh leitute awlsam nan theihtawpin hma an la tih a sawi.

"Edenthar leh World bank road, ITI Vengah workshop kan hawng tawh a, hma lam kan pan zel theih nan sawiselna kan dawngsawng thei reng a ni. Tuna kan car thar Fronz hian SUV huanga kan ṭhat tawk lohnaah mipui tan duhthlan tur tam zawk a siamsak dawn a, hma kan sawnpui ngei ka beisei," a ti.

Maruti Suzuki-in SUV huangah ṭan an la a, Grand Vitara an tihchhuah hnuah man tlawm zawka lei theih turin Fronz an tichhuak thar leh a, Rs nuai 7.5-13 thleng man chi hrang hrang a awm.

Mid-SUV emaw Compact SUV emaw huangah Maruti Suzuki siam duhthlan tur ṭha a awm hnem phah bawk a; Fronz hi mi ṭhenkhatin model awm tawha an duh khawp loh phuhrutu leh ngaihngam taka an lei theih tura ngaih a ni.

Suzuki tech hmangin a chhung leh pawn thuam a ni a, thiamna sang leh changkang taka duan niin kawng hrang hrangah an car model hmasaa awm lo thil ṭha an bilh tel nual.