Blackpink Jennie'n ama pual collection buaipui mek

Blackpink singer, Jennie chuan khawvel huap brand lar Calvin Klein nen ṭangkawpin ama pualin thawmhnaw lam collection a tichhuak dawn a, a fans tan chuan hak chakawm tak tur a ni ngei ang.

Kum 27 mi, K-pop star hi kum 2021 aṭang khan Calvin Klein brand ambassador a lo ni tawh a, tunah an designer-te nen ṭangkawpin a fashion collaboration hmasa ber a buaipui chho mek a ni.

Jennie chuan ama pual collection a nei thei tur chu atan chawimawina sang tak a nih thu sawiin, "Brand hmingthang berte zingah keima puala thawmhnaw chi hrang hrang ka nei thei tur hi ka lawm hle a, fabric te takte aṭanga rawng thlan thlengin ka phur tawh hle. Ka tan chawimawina hlu bik a ni," tiin,"Piece tinte hi an hluin an simple hle a, i closet-a thawmhnaw nen pawh inchawhpawlh leh inhmeh tak turte vek an ni," tiin I-D magazine-in an kawmnaah a collection thar chungchang a sawi.

Jennie capsule collection for Calvin Klein-ah hian South Korean singer kutziak a chuang dawn a, bralettes leh bottom aṭanga joggers, T-Shirt, sweater and knitted dresses thlengin chhawpchhuah a ni ang.