Karnataka Chief Minister post chuhtu dang awm leh

Karnataka assembly inthlan neih zawh takah Congress party chu hneh taka thlan tlin niin, party malin sorkarna an siam thei dawn. Hetih lai hian Chief Minister tur ruat fel a la ni lo a, state Congress president DK Shivakumar leh chief minister hlui Siddaramaiah-ten CM post an inchuh mek karah chuhtu dang an rawn awm belh leh.

Lingayat hnam aiawh, All India Veershaiva Mahasabha chuan Congress MLA thlan thar zingah Lingayat hnam 34 an tel tih sawiin, state CM atan Lingayat hnam MLA dah an phut. Lingayat hnam hi BJP chakna bulpui ber an ni ṭhin a, mahse an ṭan lam an thlak avangin tun ṭuma Congress party-in hnehna an chan theihna pawimawh tak pakhat zingah an tel a ni.

Party president Mallikarjun Kharge hnena lehkha an thawnah, All India Veershaiva Mahasabha chuan inthlan lo awm zel turah pawh Congress party-in Lingayat hnam thlawpna an hmuh chhunzawm zel chu a pawimawh chho dawn tih an sawi. CM post a phut bakah, an hnam aṭanga MLA thlan tlin an tam avangin cabinet post pawh eng emaw zat pe turin an phut bawk. Lingayat hnam hi Karnataka state mipui zinga 17% vel an tling.

Lingayat hnam bakah, Dalit hnam pawhin party hruaitu hlun, Dalit hnam G Parameshwar chu CM-a dah an phut ve leh bawk. Tumkur-ah Dalit hnamte chu pungkhawmin, 'CM atan Dalit dah ni rawh se' tih thuziakte an keng. Hetih lai hian CM post rawn chuh dang awmte hian thawm an neih len zawm erawh a rinawm lo thung.

Chief Minister thar tur chungchang hi central lama Congress hruaitute chuan an ngaihtuah mek a, Karnataka MLA thlan tharte pawh ni thum an sawipui tawh a, secret ballot hmangin vote pawh an la a ni. An vote thlak result hi Kharge kutah a awm tawh nia sawi a ni bawk.

Hetih lai hian party hotute chuan Shivakumar leh Siddaraimaiah-te lungawi ve ve theih dan tur ruahmanna dang pawh an ngaihtuah mek nia sawi a ni bawk. An ruahmanna pakhatah chuan Siddairamaiah chu Chief Minister-ah awmin, Shivakumar chu deputy Chief Minister-ah a awm ang a, state party chief a ni chhunzawm ang. Hei bakah hian Shivakumar chuan portfolio pawimawh pahnih changin, cabinet-ah a mi duhzawng pathum dah an ni bawk ang. Hei bakah hian ruahmanna dang rawt bawkin, Shivakumar leh Siddairamaiah-te chu CM post hi kum hnih leh a chanve ve ve chelh tir an rawt bawk a, mahse tunge post hi chelh hmasa ang tih erawh an sawi tel lo.