Guardians of the Galaxy Vol 3 entu an la tam hle

Guardians of the Galaxy film franchise hnuhnung ber chuan kar hmasa ang bawkin dinhmun sang ber a chelh chhunzawm leh a, Chris Pratt channa Marvel superhero movie hmuhnawm leh hlimawm tak hian kar liam ta chhung khan box office kaltlangin USD mtd 60.5 lai a la hailut thei a ni.

Entu tlakhniamna % a tlem

"Guardians" trilogy film entu hi 49% velin tlahniam mah se, film dang nena khaihkhin chuan a tlakhniamna hi a sang lem lo hle a, Marvel Cinematic Universe film zingah kar hnihnaah pawh la che ṭha ber zingah a tel phak.

Chris Pratt bakah film hmasa lama role pawimawh chang a, a aw thawhtu - Zoe Saldaña, Dave Bautista, Karen Gillan, Pom Klementieff, Vin Diesel, Bradley Cooper, Will Poulter, Sean Gunn, Chukwudi Iwuji, Linda Cardellini, Nathan Fillion, leh Sylvester Stallone-te chetla hi 'film ngainatu ka ni' inti tan chuan en hmaih loh turte zinga mi a ni.

Marvel movie dang - "Ant-Man and the Wasp: Quantumania", "Doctor Strange in the Multiverse of Madness" leh "Thor: Love and Thunder" te kha tlangzarh a nih aṭanga kar hnih hnua entu an tlakhniamna hi 70% dawn a tling pha a, heng film-te nena khaikhin chuan GOTG Vol 3 entu hi an tlahniam mawh hle a, mipuiin an la hlut hle tih a tilang.

May 5-a tlangzarh GOTG Vol 3 hian review a hmu ṭha a, khawvel puma a sum lakluh hian a tichiang mai awm e. USD mtd 536 chuang hailut tawhin, kumin chhunga sum lakluh tam lamah palina a ni mek a ni.

Film thar film thar

USD tld 1 chuang lalut a 'One billion club' a lawmluh hlim, "The Super Mario Bros. Movie" chuan USD mtd 13 lalut lehin pahnihnaah a la inhamtang. Kum 2018-a tihchhuah "Book Club" chhunzawmna "Book Club: The Next Chapter" tih film thar chuan theatre 3,500 aṭangin USD mtd 6.5 chauh lalutin, Jane Fonda leh Diane Keaton channa hian huhang a nei lian tawk lo hle.

Film thar dang sci-fi action thriller, Ben Affleck channa "Hypnotic" chuan USD mtd 2.6 chauh lalutin paruknaah a rawn debut a, he film siamnan hian USD mtd 65 vel lai sen niin, Affleck channa zinga hlawhchham ber pawl tiin an sawi.

Karlehah chuan 'Fast X'

Naktuk, May 19 hian kumina film chhuak tur zinga thawm nei lian pawl, Fast & Furious franchise kalzel, 'Fast X' chu khawvel movie chart thunun tura beisei a ni a, he film siamna atan hian USD mtd 340 zet sen niin, film budget san lamah pariatna a han hauh phak nghe nghe a ni.