Cannes Film Festival-ah Mizo - Aldrin Zosangliana leh Napoleon RZ Thanga tel!

Kumtin May thla bawra neih ṭhin, khawvela film festival ngaihhlut ber zinga mi leh lemchanthiam rual fuankhawmna - Cannes Film Festival-ah Mizoram aṭangin Aldrin Zosangliana leh Napoleon RZ Thanga-te chu Ministry of Information and Broadcasting (India) hmalaknain an kal!

Cannes Film Festival hi May 16-27 chhungin French Riviera-ah neih ṭhin a ni. Hetah hian khawvel huapa lemchanthiam te leh, film production-a mi bikte hmuh theihin an awm ṭhin.

Ministry of Information and Broadcasting (India) chuan India ram state hrang hrang aṭangin film festival chhim tur hian mi pahnih ṭheuh thlangchhuak turin ruahmanna a siam a, I&PR (Mizoram) pawhin he ngenna hi bawhzuiin, Mizo Film Forum (MFF) kutah hlan chhawn ve leh a ni. MFF chuan an vice president Aldrin-a leh Napoleon-a te chu Cannes Film Festival hmang tur hian an thlang ta a ni.

India aṭangin Sara Ali Khan, Manushi Chhillar, Esha Gupta leh cricketer hlui Anil Kumble-te chu inlanin, Aishwarya Rai Bachchan leh Anushka Sharma pawhin he hun hi an hmanpui ang.

Amber Heard nen an inkar thubuai chinfel a nih hnua hun rei tak thawm nei loa a awm hnuah Johnny Depp pawh a film 'Jeanne Du Barry,' Louis XV period drama chu festival ni khatnaah hian premier a ni.