Science & Environment: Mizoram-ah Chawke species thar hmuchhuak; State hming changchawiin 'Gekko mizoramensis' phuah a ni

Mizoram University leh Max Planck Institute for Biology , Tubingen, Germany-a researcher-te chuan Mizoramah chawke thlawk thei, flying gecko species thar an hmuchhuak a, state hming changchawiin Gekko mizoramensis tiha phuah zui a ni.

Amphibian leh reptile zirchianna, herpetology lam tichhuak ṭhin German journal pakhat - Salamandra chuan zirchianna chungchang hi Thawhṭanni khan an tarlang.

"Chawke thlawk thei emaw, parachute emaw tleng thei chi hi Chawke peng pakhat - Ptychozoon tih aṭanga phuah an ni. Khawvel pumah species 13 an awm a, Asia chhimchhak lamah hmuh an ni tlangpui. Heng species zingah hian Ptychozoon lionotum emaw chawke tleng thei chi te hi Mizoramah chauh hmuh an ni," tiin Mizoram University-a zoology department head leh zirchianna neitu zinga mi, HT Lalremsanga chuan a sawi.

"Mizorama hmun hrang hrang- Kolasib district-a wildlife sanctuary, Dampa Tiger Reserve leh Lawngtlai district-a zirchianna kan kalpui hnu leh DNA test-te kan tih zawhah, species danglam tak a ni tih kan hmuchhuak," a ti.

Chawke thlawk thei dangte ang bawkin, he species thar hi cm 20 vela sei a ni a, thingkungahte khawsa kualin, zan lamah an che chhuak ṭhin. Chawke thlawk thei te hi an ke a hlai ṭhain, an mei a phek vek a, awlsam takin an tleng theih phah ṭhin. (Chawke thlawk thei, Flying gecko tih hming pu mah se, an thlawk thei tak tak lo thung)

"Species thar hi uluk taka species dang nen khaikhin a nih hnuah, a tirah a ni emaw kan tih; Myanmar rama kan hmuh tlanglawn ber Ptychozoon lionotum nen a in ang lo tih kan hmuchhuak. Heng species pahnihte hi ziarang inang tak ni mah se, an DNA chu 21% velin a danglam a, an pianziaah pawh danglamna mual mual an nei a ni," tiin Lalremsanga chuan a sawi.

He species thar hi Mizoramah hmuhchhuah a ni avangin researcher-te chuan state hming chawia phuah hi an thlang zui ta a ni.