Sawiselna karah 'The Kerala Story' a hlawhtling 2023-a film sum hailut tam ber 2-na ni tawh

Indian Hindi-language drama film sawizui hlawh tak, The Kerala Story chuan saipui kal lai ang maiin theatre lamah chelh din zawh rual lohin a chetṭhat a rawn chhunzawm zel. Hun rei lo te chhungin kumina India rama film chhuak tawh zinga sum hailut hnem pahnihnaah rawn inhlangkaiin, Shah Rukh Khan channa ‘Pathaan,’ chiah a phak tawh lo.

The Kerala Story hian Nilaini khan Ranbir Kapoor channa‘Tu Jhoothi Main Makkaar’ leh Salman Khan channa ‘Kisi Ka Bhai Kisi Ki Jaan’-te khumin, nimin thleng khan Rs vbc 200 chuang a hailut tawh.

Sawiselna karah

Kerala-a party lian pahnih, Communist Party of India (Marxist) leh Indian National Congress-te chuan hnam leh chi inthliarna chawkchhuak thei tiin an lo dodal tawh a, Tamil Nadu-a political party ṭhahnem takin he film vang hian khawpuiahte lungawi lohna an lantir avangin screening khap lailawk a ni bawk.

He film tlangzarh ṭan tirh khan khawtlangah inrem lohna thlen thei tiin Madras High Court, Kerala High Court leh Supreme Court of India-ah petition theluh a ni.

May 8 khanWest Bengal sorkar chuan buaina chhuah venthawn thilah an state-ah chhuah an khap (ban)a, film siamtute chuan Supreme Court-ah an khing mek. Producers Guild of India chuan state ṭhenkhatin dodalna an lantir chu ṭha ti loin, CBFC pawmpuina hnuaia chhuah a nih thu leh, film hi political party te'n an duh duha an khapbeh theih a ni lo, tiin thuchhuah an siam.

Hetih lai hian, Haryana, Uttar Pradesh, Uttarakhand leh Madhya Pradesh-ahte erawh he film hian thlawp a hlawh hle thung a, mipui tam zawk an hip theihnan chhiah chawi ngai lo, tax-free a nih thu an puang hial.

Adah Sharma channa The Kerala Story hi May 5 khan India ramah tlangzarh a ni a, he film-ah hian Kerala-a hmeichhiate chu Islam sakhuaah inleh luihtir an nih dan leh, firfiak pawl Islamic State (IS) a lakluh an nih dan chanchin ngaihnawm taka tarlan niin, tunlai Indian film zinga 'hot' ber a ni mek.