C. Vanlalroluahtumi MV hmasa ber MDM channel-ah ngaihthlak theih dawn

Mizo Idol intihsiakna hnuhnung bera pahnihna, C. Vanlalroluahtumi (Tumtumi) chuan a official music video hmasa ber 'Lungpui nghet' chu Zonet lama an tihchhuah hnuah, zanin aṭang hian MDM YouTube Channel-ah a duh apiang ngaihthlak theihin chhawpchhuah a ni ve leh dawn ta!

Mizo Idol en ṭhinte chuan Tumtumi zaithiam zia inhrilhnawn kan ngai tawh awm lo e. Pathian fakna hla lam sa chi a ni a, a zaiah hian a ti tak tak a ni tih a ngaithlatute'n kan hrechiang ber awm e.

'Lungpui nghet' tih hla hi Nipuii Varte phuah niin, Hlimhlimi 'Ka hlan a che' leh, Lalduhsaki 'I fak ang u' tih hla mawi tak lo phuah tawhtu a ni nghe nghe.

A zai mawi tak phenah hian Besy Choir member - Rempuii, Tetei leh Effie te'n backing vocals an rawn pe a, a hla thluk siamtu hi Synod Choir Conductor hlui T.Laldintluanga a ni. Zta Khawlhring chuan a produce sak a, recoding hi Edensvine Records-ah neih niin, video hi Moonshine Studio kutchhuak a ni. He hla hi live veka tih niin, musician-te chu Keys-Vistea, Bass- Rema, Guitar-Philip, Drums - Zta khawlhring te an ni.