'Two-day International Symposium on the History of Astronomy of the Mizo People’ zo fel

Mizoram University (MZU)-a Dept. of Physics leh, Mizoram Science Centre, Dte. Of Science & Technology, GoM ṭangkawpin May 18 -19 chhunga ‘Two-day International Symposium on the History of Astronomy of the Mizo People’ an buatsaih chu MZU Auditorium-ah nimin khan zawhfel a ni.

He International Symposium ni hnihna hi MZU Vice Chancellor Prof. Dibakar Chandra Deka chuan hmanpuiin, keynote speaker Dr. Martin George, Principal Astronomer, Hive Planetarium, Tasmania, Australia chuan zirlaite hmaah astronomy thehlarna tur thupui a sawi.

Symposium public lecture hunah Er. H. Lalsawmliana, CSO, Directorate of Science & Technology chuan kalkhawmte lawmna thu a sawi a, Prof H.K. Laldinpuii Fente, Director, Office of International Affairs, MZU chuan thusawitu Dr. Martin George hmelhriattirna leh a chanchin tawi sawina hun a nei bawk.

Dr. Martin George, Australia hi khawvel huapa astronomer hriat hlawh tak niin kum tam tak kalta aṭang khan khawvel hmun hrang hrangah zin kualin astronomy zirtirna a lo kalpui tawh ṭhin. Dr. Martin George chuan MZU Auditorium-a kalkhawmte hmaah arsite leh vansang lam chanchin chu mi zawng zawng huapzo, mihringte thinlung nen inhnaih tak a nih thu a sawi. Khawvel hmun hrang hrangah hnam tin ten sakhuana leh hnam ziarang mila arsi thawnthu an neihte a lem nen a entir bawk. Mizo pi pute pawhin arsi an lo ngaihven leh, thawnthu mai bakah Mizo thu leh hlaa hmun pawimawh tak an lo chang chu ngaihnawm a tih thu leh chhinchhiahtlak tak a nih thu a sawi bawk a ni.

Dr. Martin George thusawi ngaithla tur hian MZU zirlai leh zirtirtute bakah Dawrpui School of Science & Technology, Mt. Carmel School, St. Joseph Higher Secondary School leh St. Paul’s Higher Secondary School naupang ṭhahnem tak an kalkhawm a ni. Sawihona hunah hian school naupangten zawhna an neihte chu Dr. Martin George hian a chhang nghal bawk.

Symposium public lecture hunah hian MZU VC, Prof. Deka pawhin thu sawiin Prof. Zaithanzauva Pachuau, HOD Physics Dept., MZU chuan lawmthu sawina hun a hmang.

Chawhnu lamah Mizoram Science Centre, Berawtlangah symposium buatsaihtute leh chhimtuten Dr. Martin George kawmna hun neiin Planetarium an tlawh bawk.

Ni hnih awh International Symposium-ah hian Prof. Laltluangliana Khiangte, Dept. of Mizo, MZU chuan Rev. Liangkhaia ziak lehkhabu ṭangkai leh rohlu , 'Arsi Chanchin: Mizo hriat dan’tih a tlangzarh bawk a ni.