Battlegrounds Mobile India a khelh leh theih dawn!

Mizote zinga online gaming app lar ber pawl, Battleground Mobile India (BGMI) chu sorkar laipui phalnain ram chhungah thla thum chhung khelh phalna pek lailawk a ni!

South Korean gaming company Krafton hnuaia mi, BGMI hi nikum khan sorkar thupek hmang vekin app store aṭanga paih a lo ni tawh a, he khapna dan an tihchhuah hma hian user maktaduai 100 chuang a nei hman.

Minister of State for Electronics and IT, Rajeev Chandrasekhar chuan BGMI chuan server location leh data security chungchanga dan leh dun an zamte a paltlang avangin thla thum chhung enchhin phalna, trial approval an pek thu nimin khan a sawi.

Nikum khan, PUBG game chu Tencent front company Krafton-in an tharthawh leh avangin, NGO PRAHAR ngenna angin he game hi India ramah khap a ni a, Krafton erawhin BGMI leh Tencent hian inzawmna an nei lo tiin an puhna hi a pha thung.

Krafton Inc India sawi danin, South Korean organization hi ram dan ngai pawimawh tak an ni a, ram chhunga dan an siam apiang an zawm zel tur thu an sawi. BGMI hian Esports event zingah mainstream television-a viewer ngah ber record-te pawh an lo siam tawh a, concurrent viewer mtd 24 chuang neiin, total view mtd 200 chuang lai an nei a ni.