US state zinga TikTok khap hmasa ber - Montana

United States-a Montana state chuan Nilaini khan video hosting service TikTok chu an khap tih sawiin, US state zinga khap hmasa ber an ni.

Montana state governor Greg Gianforte chuan khapna thupek hi a tichhuak a ni. State mipuiten TikTok an hmang emaw, TikTok download link an pechhuak emaw a nih chuan hrem theih niin, dan bawhchhe lui an awm a nih chuan USD 10,000 chawitir theih an ni ang.

He khapna dan hnuaiah hian Apple leh Google-te pawhin an app store aṭangin TikTok hi an paih a ngai tawh dawn tihna a ni a, an dah lui a nih chuan nitin pawisa an chawi a ngai dawn tih state thuchhuah chuan a tarlang.

TikTok hian India mai ni loin, United States, Canada leh khawthlang ram dangahte pawh dodalna a tawk nasa hle. He app hi Chinese firm ByteDance hnuaia awm niin, China sorkarin ram dang enthlakna hmanrua pawimawh tak tiin US politician-te ann lo sawi tawh nghe nghe a, company erawh chuan he puhna hi thu belhchian dawl lo tiin an pha nasa hle thung.