Aengi & Rosalyn hla thar zaninah

Kum 2021 Thazual Award aṭanga kan hriat lar, ṭhianga zai (duo) inkawp fuh em em mai Aengi & Rosalyn chuan anmahni hla ngei, “Rinawm min tiam kha” tih chu zanin dar aṭangin Darbu Exclusive ah ngaihthlak theihin an rawn dah chhuak dawn ta. He hla hi K.Hminga phuah leh produce niin, anmahni puala hla hmasa ber a ni. He hla hi Rs. 15 a lei theih niin, kan zaithiamte kan 'support' zia lantir nan a aia to pawhin a lei theih a, Darbu Music App kaltlang hian kan ṭhianṭha leh duhsak bikte tan thlengin a leisak theih bawk.

Eng lam hawi nge ni dawn?

He hla hian hmangaihna thuthlung intiam tawh, sût leh nat zia a rawn sawi chiang hle. A phuahtu K. Hminga hian hla phuah lama a chungnun zia rawn pho lang lehin, a satute inhmeh turin a music leh a hla thu hi a inrem dik em em a; hla ngaihthlak maia dam diai, amaherawhchu a thu erawh lungchhiatthlak tak si hi Aengi leh Rosalyn hian a nihna tur dik takin an rawn sa chhuak a ni.

ABBA vanglaia Agnetha leh Anni-Frid inkawp fuh tluk zetin an aw a inchawih mawi a, Mizo rilrem, kan nin theihloh leh eng hun nen pawha lunglen hnem thei hla kan tih ang huangah ziah luh theih a ni awm e.

Artist bul ṭanpui turin Darbu Launchpad tlangzarh a ni

He hla hi Darbu Music Program thar, Darbu Launchpad: New Artist Promotion Program hnuaia release hmasa ber niin, Darbu Music hi bul ṭan thar chauh ni mah sela, an din chhan leh an thil tum bulpui ber pakhat chu Artist ṭha tak tak, theihna sang tak nei te chawikan a, career mumal tak nei thei tura puih hi a ni. Chumi atan chuan he program hi hawn a ni. He Program hmang hian artist ṭha, a bik takin, independent artist career bulṭan dan hre lo te tan engtiklai pawhin an inhawng reng a ni. Producer ṭha zawnpui mai bakah, an recording leh music production man zawng zawng tumsak an inhuam a, promotion ah pawh theihtawp chhuah pui an intiam bawk.