Ni 100 chuang harhfimin ka awm tawh - Liam Payne

One Direction member ṭhin, Liam Payne chuan a hringnuna 'direction' dik a zawh chho mek zel niin a lang. IFL TV-in an kawmnaah, "Ni 100 chuang harh fimin (sober) ka awm ta. Ka hlimin, a nuam ka ti tak zet zet a ni," tiin fans aṭanga thlawpna ṭha tak a dawn avangte pawn lawmthu a sawi nghal bawk a ni.

Payne hian vantlang hriatah zu ngawlvei a nih thu hi a pha ngai lem lo. Kum 2019 khan, a rawn larchhuah ṭanna talent show “The X Factor” hnuah, Zayn Malik, Niall Horan, Louis Tomlinson leh Harry Styles-te ho nen kum zabi 21-naa boy band lar ber tiha chhal ngam One Direction-a a tel lai pawhin zu vang hian harsatna a tawh ṭhin thu Men’s Health Australia-in an kawm ṭumin a sawi. Payne chuan stage a chuankai hmain a rilru tawt lutuk tihziaawmnan zu a in ṭhin thute pawh a sawilang a ni.

Zu a nghei piah lamah Payne chuan album thar a buaipui mek tih sawiin, "Tun ṭum chu tour neih ka chak takzet. Hun rei tak ka zinkual thei dawn lo emaw ka tih hnuah hringnun hi mak takin a rawn inher mek a, ka thil tawn ngai loh ka tawn mek vang pawh a ni ang. Tour-a zinkual kha ka hne hman lek leka mah se, tunah chuan khawvela fan paha fans hmuhte pawh ka phur tawh hle a ni," a ti.

One Direction kal vung chhoh lai, kum 2010-2015 inkar kha chuan an khawvel pumah an boruak kha a lianin, an hunlai na na na kha chuan 'luck' rem rem tak an ni. Kum 2015 khan an band chuan chawlhlailawk an puang a, Zayn-a'n band a chhuahsan zui bawk nen tunah chuan an solo career ṭheuh buaipuiin hun an hmang tawh a, Payne pawh hian kum 2019 khan a solo album hmasa ber "LP1" a lo tichhuak tawh bawk a ni.