Tun ang em em hian Ka la hlim ngai lo - Taylor Swift

Joe Alwyn nen kum ruk chhung zet an inzui hnuah February thla khan an inṭhen thu a puang a, hun tam a liam hmain The 1975 frontman Matt Healy nen an inkarah thawm lian tak a rawn irhchhuak leh nghal. "Anti-Hero"singer hian Foxborough, Massachusetts-a Eras Tour a neih laiin a fans-te zawhna chhangin, "Ka hrilh chak riau che u. Tun ang em ema ka hlim hi ka la hre ngai lo, ka hun kal tawhte pawh tiamin. Ka nun hian awmzia a nei chho ṭanin ka hria" tiin a chhang.

Matty Healy nen an inzui mek chungchangah fans-te ngaihdan pawh a inang lo hle. Ṭhenkhatin an lawmpuia inhmeh an tih em em laiin, ṭhenkhat erawhin mimal buaina ngah tak lakah inthiarfihlim turin online campaign an lo kalpui mek bawk a, hashtag "#SpeakUpNow," tih hmangin Swift hnenah hian open letter an thawn nghe nghe a ni.

Matty hian vun rawng hmuhsitna leh khaw hmu lo khawpa mahni pawl ṭan mi tiin chhuahchhal a lo tawk fo tawh a ni. Kumin February thla khan, Japan-a concentration camp lema thawk anga inlanin, Scottish ṭawng sawi chhe zawng leh, Hawaiian, Inuit leh Chinese accent nuihsawh zawnga a ṭawng chhuah avangin ei lotu a ngah phah viau bawk.

British musician pawh hi rawn insawifiah zuiin, "Mi rilru tina tur zawnga sawi ka ni lo. Fiamthu duh mi ka ni a, mi tihder vel hi nuam ka ti, mahse min puhna erawh ka nihna dik tak a ni lo," tiin a ṭawngkam chu a nihna pholangtu a nih loh thu a sawi.