Nepal sipai hluiin ke pahnih bul chungin Mt Everest lawn chhuak

British Gurkha sipaia ṭang ṭhin, kum 43 mi Hari Budhamagar chuan khawvela tlang sang ber - metre 8848.86 a sang Mount Everest chu kar kalta Zirtawpni khan lawnchhuakin, ke pahnih bul (double-amputee) leh, ke lem (artificial legs) hmanga lawn chhuak hmasa ber a ni. Record thar hi a siam hi Department of Tourism official-te chuan Inrinni khan an puang.

Budhamagar hian UK sorkar hnuaia British Gorkha sipaia a ṭan lai, kum 2010 khan Afghanistan-a ral an beihna kawngah a ke pahnih hi a chan a ni.

Mitdel, ke pahniha bul leh mimala lawn khapna dan khauh tak an siam avangin Budhamagar-a'n kum 2018-a tlang sang ber a lawn tumna chu a lo ṭhulh lailawk tawh a, ni. Mahse Supreme Court-ah petition thehluh a nih hnuin, kum 2018 khan he dan hi a rawn tidanglam a, hei vang hian Budhamagar chuan mellung pawimawh tak a rawn siam thei ta a ni.

Nepal sorkar chuan kumin hian Mount Everest lawn phalna mi 466 hnenah a pe chhuak tawh a ni. Khawvela tlang(peak) sang zual 10 zinga 8 chu Nepal rama awm an ni.