Kum 14 mi "Princess From The Slum" Luxury Beauty Brand hmatheh atan thlang

Mumbai-a Dharavi Slum-a khawsa, kum 14 mi Maleesha Kharwa chu luxury beauty brand, Forest Essentials te'n naupangte chawikanna tur leh rahbi thar an kai theihna tura an hmachhawp campaign thar, 'The Yuvati Collection'-a hmatheh berah thlan a ni ta.

Maleesha hi kum 2020 khan Hollywood actor, Robert Hoffman-a chuan rawn hmuchhuakin, a pualin 'Go Fund Me' page a siamsak. Tunah chuan Maleesha hian Instagram-ah followers 2,25,000 chuang nei tawhin, #princessfromtheslum tiha hriat lar a ni tawh. Modelling gigs ṭhahnem takah te inlan tawhin, short film "Live Your Fairytale" tihah pawh a lo chang tawh a ni.

Vogue India-in Forest Essentials founder and chief managing director Mira Kulkarni an kawmnaah, "Kan Yuvati collection kaltlang hian Maleesha suangtuahna tihpuitlinna kawngah kan puih dawn bakah, naupang zawkte hmachhawp hrang hrangte chawikangtu nih tumin hma kan la a ni," a ti.

Maleesha pawhin Forest Essentials nen an thawkdun thei chu lawmawm a tih thu sawiin, "Ka hnathawh tawh azawnga la lian ber a ni. Model nih ka duh a, mahse ka zirna hi a kal hmasa ber zel ang," tiin eng kawng pawh zawh se zirna a dah hmasak zel tur thu a sawi.