billboard: Morgan Wallen-a'n kar 11 chhung ro a rel ta!

Country lal thar, Morgan Wallen chuan record thar rawn siam belh lehin, a abum "One Thing at a Time" hmangin kar 11 chhung Billboard 200 albums chart-ah ro a rel ta!

Wallen-a phak loh Titanic soundtrack

The Voice aṭanga hming rawn chher, Wallen hian equivalent album unit 1,34,500 hmuchhuak lehin, mi bikte huangah a rawn inhlangkai. Wallen hian Stevie Wonder-a album "Songs in the Key of Life" leh, Whitney Houston album "Whitney"-te chu kar 11 chhung No.1 niin rorelna an lo chelh tawh a, he record duhawm tak hi a rawn nih rual chiah a, kum 1998-a kar 16 chhung zet ro lo rel tu "Titanic" soundtrack chiah kha a phak ta lo a ni.

Swift leh Jonas Brothers

Eras Tour hlawhtling taka hmang mek tu, Taylor Swift studio album 10-na "Midnights" pawhin hniam lam a la pan hleithei lo a, music industry pawn thlenga thawm ngah tak hian a tour hi a chhawr ṭangkai hle tih a lang. Hetih lai hian an vanglaia huhang ngah thei tak, Jonas Brothers rawn intuaitharna album "The Album" chu pathumnaah rawn inhlangkai nghalin, equivalent album unit 52,000 an hmuchhuak tawh.

NBA YoungBoy (YoungBoy Never Broke Again) "Richest Opp" chu palinaah a rawn lang a, he rapper special tak hian kum 2018 aṭanga chhiarin top 10-ah album 15 lai a lo lanpui tawh! YoungBoy chungah hian Jay-Z leh Nas-te awmin , anni hian Billboard 200-ah top 10 album 16 ve ve an nei tawh a ni.

A hla copyright chungchanga buaina neuh neuhte a chinfel hnuah Ed Sheeran chuan album thar '– (Subtract)" a tichhuak a, beisei ang erawhin a che ṭha tawk lo. Kar hmasa khan pahnihnaah a rawn debut a, tunkarah erawh pakuanaah a tlathla ta thung a ni.