Khawvel huap zai intihsiakna hlun leh ngaihven hlawh ber pawl, American Idol season 21 chu a hmawr bawk a ni ta a, kum 18 mi Hawaii tlangval, high school zirlai Iam Tongi chu a thiam ber.
A pa thihna avangin lainat a hlawh
Tongi hi American Idol-a audition a neih hmain a pa chu heart attack vangin a thi a, a zaithiam piah lamah a hringnun thawnthu avang hian season tluanin entute lainat a hlawh phah hle. Iam Tongi audition hi American Idol YouTube channel-a views ngah ber a nih phah hial a ni. 
Final zanah James Blunt nen “Monsters” tih hla an sa dun a, "I fapa ka ni lo a, ka pa pawh i ni hek lo. Patling ṭhankin pahnih kan in mangṭha mai a ni," tiin he hla sa tluan thei loin a awm a, kalkhawmten an mittui an dang zo bik lo. 
Kumin hian finalists pathum - Iam Tongi, Megan Danielle, leh Colin Stough-te chuan intihsiakna hi hmachhawnin, a tawpah Hawaii tlangval hi a dingchang ta a ni. 
Final zan hian Blunt bakah Pitbull, Ellie Goulding, Lil Jon, Kylie Minogue, REO Speedwagon leh TLC te'n performance hmuhnawm tak an rawn lantir bawk.
Ryan Seacrest a lo kir
Season finale-ah hian judge - Luke Bryan, Katy Perry leh Lionel Richie-te'n an thiam thil an rawn lantir a, American Idol ti 'idol' tu presenter hmingthang - Ryan Seacrest chuan tun season aṭangin a rawn host leh bawk nen, kum dang zawng aiin entu pawh hi an ṭhahnemin, ratings pawh an hmuhsan phah hle.