Jeff Bezos leh Lauren Sánchez an inhual

Amazon dintu, khawvela pa hausa pathumna Jeff Bezos (59) leh Lauren Sánchez (53)-te chu kum li chuang an inzui hnuah an inhual tih khawthlang media-te chuan an tarlang leh ta chuai chuai mai.

Bezos-a nupui hual Sanchez hi broadcast journalist-ah a ṭang ṭhin a, tunah midang tana rawngbawltu, philanthropist a ni tawh. Kum 2019 khan vantlang hmuhah an inzui ṭan a, event eng emaw zatah kal dun ṭhin mah se, an chanchin leh inkar thute hi thui tak an tilang ngai lem lo thung.

Kum 2022-a CNN in an kawmnaah philanthropic lam hna thawka hun hman chu nuam an tih thute sawiin, Bezos-a hausak ren rual loh chu kawng hrang hrangah an pekchhuah ṭhin thu an puang.

Sánchez chuan mi dang tan luanchhuahna tur a nih chuan teammate ṭha tak an nih thu a sawi a, Bezos chuan, "Mihring ka tawn tawha thilphal leh rilru zau tak a ni a, phurna nasa tak min petu a ni," tiin a nupui hual chu a fak hle. Kar hmasa lawk pawh khan Spain-ah USD mtd 500 man luxurious yacht-ah nuam an tawldun lai pawh hmuh an lo ni tawh a ni.

Bezos leh a nupui hlui MacKenzie Scott-te chu kum 25 an inneih hnuah an inṭhen a, fa pali an nei hman. Scott hian an divorce settlement kaltlangin USD tld 38 lai a dawn phah nghe nghe.

Sánchez hi a kawppui hlui Hollywood agent Patrick Whitesell nen kum 13 chhung an inzui a, fa pathum neiin kum 2019 khan an inṭhen ve leh a ni.