WhatsApp-a message thawn tawh 'edit' leh theih

WhatsApp chuan feature thar tichhuakin, message thawn tawhte chu tihdanglam 'edit' theih a ni tih Mark Zuckerberg chuan Thawhṭanni khan Facebook post kaltlangin a puang.

WhatsApp user-te chuan message an thawn aṭanga minute 15 ral hmain an thu thawn, message-te chu an tidanglam thei tawh dawn. Feature thar ber hi khawvel puma WhatsApp hmangtute tan a tahtawla update mek niin, tun kar chhoah user tin hman theih turin chhawpchhuah chhoh zel an tum thu an sawi.

A hma kha chuan WhatsApp-a message thawn sual chu an delete emaw message hranah tihdikna an thawn emaw a ngai ṭhin a, tunah chuan a hmangtute awlsam zawknan siam danglam theihin an awm ta a ni. Hei bakah hian message thawn tawh delete theih hun darkar 48 ni ṭhin chu darkar 60-ah pawhsei a lo ni tawh bawk.

App hian feature thar, 'Chat Lock' tih chu tunhnai lawk khan tichhuakin, private conversation chu password hmangin midang en theih loh turin a vawn him thei tawh a, folder hranah a thawntu hming nen dah hrangin, message thar an dawn pawhin notification-ah a lang dawn lo a ni.

Hei bakah hian, WhatsApp hian thlalakte chu sticker-a siam theih tur feature thar pawh chhawpchhuah an tum thu an sawi bawk.