'FAST X' a tlan chak ber

Fast and Furious film franchise thar ber, "FAST X" chu opening weekend-ah rin lawk ang ngeiin a che ṭha a, kar kalta chhung khan North American box office aṭangin USD mtd 67.25 lalutin a hnuaia mi te lakah a tlanchak fal hle.

"F9" a phak lo

Kum 2021-a tihchhuah, "F9" khan opening weekend-ah USD mtd 70 lalutin, FAST X hian USD mtd 3 vel chauhin a phak lo. Film che ṭha bik huangah chhiar theih ni chiah lo mah se, US-a tlangzarh a nih hmain Europe leh South America ramahte tlangzarh hmasak niin, ramdangah hian a che ṭha ang reng hle. Khawvel puma a sum lakluh belhkhawm hi USD mtd 323 tling tawhin, kumina film chhuak zinga sum lakluh tam lamah parukna dinhmun a hauh mek.

Paul Walker thihna kal zel

FAST X-ah hian film hmasa lama role pawimawh latu–Vin Diesel, Jason Momoa, Michelle Rodriguez, Brie Larson, Tyrese Gibson, Ludacris, John Cena leh Sung Kang-te hmel kan hmu leh a, he film franchise hlawhtlinna kawnga thawhhlawk tak, fam ta Paul Walker-an mual a liam hnuah erawh he film hian a huhang a hloh ṭhen em tih chu zawhna lian tak a ni.

"Fast X" hi an film franchise zingah opening weekend-a sum hailuh tam lamah pasarihna a ni a, "F9: The Fast Saga" (USD mtd 70) leh, "Fast & Furious Presents: Hobbs & Shaw" (USD mtd 60) inkarah a tlazep.

Film dangte

Kar hmasa lama pakhatna hauhtu,"Guardians of the Galaxy Vol. 3" chu a lallukhum hlihthlak sak a ni ta. He film hian USD mtd 32.7 lai lalut tho mah se, pahnihnaah a lungawi a ṭul. Chris Pratt channa tho, "The Super Mario Bros. Movie" chuan USD mtd 9.8 lakluh belhin pathumnaah a tlathla a, North America bika a sum lakluh ringawt hi USD mtd 550 a tling tawh a ni.