"Ka hlawhtlinna hi ka thawhrim rah a ni" – Ishita Kishore, Civil Services Exam Topper

Delhi University graduate leh Air Force officer fanu, Ishita Kishore chuan civil services examination-a pakhatna dinhmun meuh han hauh chu mang lamah pawh a la man phak ngai loh thu sawiin, IAS officer hna a thawh hunah hmeichhiate chawikanna, women empowerment lam a ngaih pawimawh tur thu a sawi.

Kum 26 mi, Kishore hian khawvela exam hautak berte zinga mi hi a vawi thum exam naah a tling a ni. "Civil services examination vawi hnih ka hlawhchham hnu pawha ka bula ding tlat ṭhin ka chhungte chungah lawmthu sawisen loh ka ba," tiin exam inbuatsaihna atan hian nitin darkar riat aṭanga darkar kua vel hun a hman ṭhin thu leh, kar khatah darkar 40-45 inkar a zir ṭhin thu a sawi. "Ka hlawhtlinna hi ka thawhrim rah a ni," tiin a beih nasat zia uar takin a sawi lang nghe nghe.

Ishita Kishore-i pa hi Air Force officer niin, a nu hi private school-ah a thawk ṭhin a ni.

Football khel thiam Ishita

Ishita hi national-level football player niin, kum 2012 khan Subroto Cup football tournament-ah te pawh a lo inlan tawh a ni. Greater Noida-ah cheng mekin, Shri Ram College of Commerce, University of Delhi-ah Economics (Hons.) graduate a ni a, a optional subject atan political science leh international relations a thlang.

UPSC exam 2022 top 5-ah mipa pakhat, Assam doctor Mayur Hazarika chiah rawn langin, pakhatna aṭanga palina dinhmun hauhtute hi hmeichhia vek an ni. Result pumpui thlirin candidate 933 tling zinga 613 chu mipa an ni a, mipa lam an chungnung thung. Hmeichhia 320 an tling a, a tiṭha zual 25 zinga 14 lai chu hmeichhia an ni.