Jharkhand state-a nu pakhat chuan Thawhlehni khan Rajendra Institute of Medical Sciences (RIMS)-ah fa panga lai a hring a, naute te hi an hriselna a ṭhat thu leh Neonatal intensive care unit (NICU)-ah uluk takin an hriselnate en thlithlai reng a nih thu an sawi.
Heng naute te hi an taksa rih dan tur pangngai aiin a hniam (underweight) hlawm a, a ruala naute panga piang hi quintuplets tiha koh ṭhin an ni. Quintuplets hi naupiang mtd 55-ah ṭum khat chauh thleng ang a ni. Chhinchhiaha theih chinah quintuplets dam khawchhuak hmasa ber chu kum 1934-a piang Canadian Dionne Quintuplets-te kha an ni.
Tunhnaiah India chu khawvel ram zinga mihring tamna berah puan a lo ni tawh a, mipui tluklehdingawn 1.4 chuang awmnaa Jharkhand-a thil thleng pawh hi a mak hran lo hle. Kum 2019 khan Andhra Pradesh-a cheng kum 73 mi, Erramatti Mangayamma chuan In Vitro Fertilisation (IVF) hmangin fa phir a hring a, doctor-te chuan caesarian section-a fa nei thei upa niin an ngai.
June 2021 khan, South African nu chuan fa 10 (mipa 7, hmeichhia 3) hringin, record thar a lo siam tawh a, hemi hnu lawk May thla khan Mali-a cheng kum 25 mi Halima Cissé chuan a ṭum khatah fa pakua lai a hring zui ve bawk.
Guinness Book of World Records tarlan danin, hmeichhe zinga fa hring hnem ber khan 69 a hring a, a hming hi tarlan ni lo mah se, Russia-a thingtlang khua Shuya-a mi Feodor Vassilyev (b. 1707–c.1782)-a nupui hmasa ber nia sawi a ni.