Joseph Zaia album hnuhnung "Tunge Maw Ka Nih Le" zaninah ngaihthlak theih dawn

Joseph Zaihmingthanga gospel album, 'Tunge Maw Ka Nih Le' tih chu Darbu Music App kaltlangin chhawp chhuah a ni dawn ta.

MZI president Lalrothanga chuan zanin dar 8 hian he album chhawpchhuahna hun hi hmangin, Super Trio member pahnih Vanlalsailova leh Robert Lalduhzuala-te pawhin sawihawnna an nei ang.

Joseph-a gospel album 2-na tur

'Khawvel A Ngam Ta' album kha kum 2007 khan tlangzarh a ni a, hla 12 awmin zaithiam fam ta Joseph Zaihmingthanga gospel album neih chhun a ni. Album-a hla 12 bakah hian hla pathum recording buaipui lai hian siam puitlin an ni . 'Khawvel A Ngam Ta' album tihchhuah hnu lawk khan Joseph-a hian hla dang eng emaw zah record zuiin chung hlate chu official taka tlangzarh a ni ta lo.

'Khawvel A Ngam Ta' album-a an dah tak loh hla pathum bakah, Joseph Zaia hian hla dang paruk a record-te chu remchanga tlangzarh sak a, produce sak turin a producer kutah a hlan a ni. Kum 15 vel zet mumal taka tlangzarh lohin a awm zui a ni.

Hetih chhung hian Joseph-a hian heng hlate hi ama Youtube channel-ah dahin Youtubers tam takin an post chhawng nasa hle. Hla ṭhenkhat phei chu single release anga tichhuakin music video te pawh a siam nghe nghe.

Heng a hla la tlangzarh mumal loh hla pakuate hi a producer hnena a pek hnuah Darbu Music App hnenah nikum khan a album dangte nen ṭangkai zawk leh, mumal zawka a hlate vawnhim a nih theihnan tiin a lo pe bawk. Joseph-a hian 'Khawvel A Ngam Ta' producer pawh be rawnin he album ngei pawh hi Darbu Music App ah hian dah a ni.

Tuna a hla tlangzarh loh ṭhenkhatte pawh Darbu music app enkawltute hnenah hian a lo pe tel nghe nghe a, Darbu lam hian mumal taka la tlangzarh loh a nih avangin an app aṭang pawh hian a la chhuak zui a ni.

Eng hlate nge awm dawn?

'Tunge Maw Ka Nih Le' album-ah hian hla pakua, hla ṭhenkhatte chu YouTube lama lo dah tawhte an awm. Hla thar, ruahṭham loh kan tih ang hi a ni lo niin producer-te chuan an sawi a, mahse mumal taka tlangzarh an nih loh avangin a ngaithla tawh leh a hla hmelhriat tawh an tam lo hle ang.

Zanina ngaihthlak theiha chhawpchhuah tur zingah hian Kristian hla bua hla lar tak 'Khawiah Pawh Lal Isua Nen' tih leh, Pastor PC Liansailova hla 'Kei Aia Hmangaihtu Che An Awm Lo' (Studio Version) te a tel.

'Tunge Maw Ka Nih Le' ngaihthlak theiha chhawpchhuah a nih hma hian YouTube channel ṭhenkhat - Robert Lalduhzuala official channel, Malsawma Photography channel leh Mizo Official Channel-ahte Super Trio-a a member pui, Sailova leh Robert-a ten a sawihawnna an nei ang a, Lalrothanga, President, MZI in ngaihthlak theihin a chhawp chhuak zui ang.

Album aṭanga sum lut a fate pualin

'Tunge Maw Ka Nih Le' album aṭanga sum hmuhte hi Joseph Zaia'n a kalsan tak a fate tan album producer-te chuan an dah dawn a. Album lei theiha chhawpchhuaktu Darbu music app pawhin zaithiam dangte hnena commission (10%) an lak ṭhin pawh la loin, a thlawn liau liauin Joseph Zaihmingthanga album hnuhnung hi an buaipui sak dawn a ni.