Swedish supergroup, Abba reunion beiseia nghaktute beiseina chu a thleng dawn ta lo. Group member, Bjorn Ulvaeus leh Benny Andersson-te chuan an ram, Sweden a 2024 Eurovision Song Contest-an nghah hunah reunion an nei dawn loh thu chiang takin an sawi. 2024 hi Abba-in Eurovision intihsiaknaa pakhatna an nih cham kum 50 na a ni a, heta an hla sak 'Waterloo' phei kha chu "Eurovision song of all time"-ah thlan a ni hial.
Kum 1974 khan Abba hi zai hmanga ram inelna ngaihhlut tak, Eurovision-ah pakhatna an ni a, hemi hnu hian Sweden hi ṭum ruk lai champion tawhin, kumiah pawh an champion leh a ni. 
USD tld 1 hnartu
Bjorn leh Benny-te chuan an damchhunga tour an tum tawh loh thu an sawi. Kum sang bi ṭan tir khan USD tluklehdingawn khat hlawha show 100 neia hmun hrang hrang fang kual tura sawmna pawh hnarin, an member hlui Agnetha Fältskog leh Anni-Frid Lyngstad-te nen zan khat pawh hun hman dun an tum tawh loh thu a sawi. "Keiin ka duh lo ang bawkin, anni pawhin an duh bik ka ring lo. Kan pali ngaihdan hi a in ang vek a, miin 'a theih loh' an tih chuan kan pawm mai tur a ni," tiin "Stage-a inlan kher loin Abba kum 50 tlin lawmna hun kan hmang thei," tiin Ulvaeus chuan inhmuhkhawm tumna an neih tawh loh thu a lo sawi tawh. 
Kum 43 hnuah Abba Voyage 
Tunlai thiamna sang tak nen London-a 'Abba Voyage' virtual concert neih a lo ni tawh a, beisei phak bakin lawm an hlawh a, an vanglai tluk zeta ngaisangtu an la nei kha mak an tih thu Ulvaeus chuan a sawi. 
Abba Voyage pual hian arena lian tham tak sak a ni a, he arena hi ṭhiatsawma ram dangah pawh phurh kual mai theih tura duan a ni. London-a virtual concert tawp hunah an arena chu khawtlangin ṭangkai taka an hmanzui turin pek mai ṭha an tih thu sawiin, North America leh Asia-ahte pawh he arena ang hi siamin concert neih chhunzawm zel an tum thu an sawi bawk.
Abba hla behchhana an siam, romantic comedy film 'Mamma Mia' chhunzawmna siam an tum em tih zawhna chhangin, Andersson chuan film series dang siam an tum loh thuin a chhang. 
"Kan inthlahdah ngai meuh lo"
Bjorn Ulvaeus leh Benny Andersson-te hi kum 1966 aṭang khan an inhmelhriat ṭan tawh a, hla thar siam tuma an tuihalna chu tun thlenga an inkar nghehna chhan niah an ngai. "Kan inthlahdah ngai meuh loh vangin hma kan sawn niin ka hria a, songwriting duo tam tak pawh an nih ve ka ring," tiin kum 57 chhung khan inhmuhthiam lohna lian tham an neih ngai loh thu a sawi.