Tina Turner hla a ‘hit’ thar leh

Mipui hmaa a chevel hmuhnawm tak leh, a aw tham chak tak a hman thiam em avanga "Queen of Rock n' roll" tih hming lem an pek, Nilaini zana kum 83 mi nia fam ta Tina Turner hla chu ngaithlatu an pung chak hle. A hla tam tak zingah "What's Love Got to do With It" chu mipui duh rawn a ni. U.S. iTunes chart-ah pakhatna niin, a hla dang "All The Best: The Hits", "Simply the Best" leh "Private Dancer"-te pawh chart-ah hian an rawn invawrh thar leh a ni. Hei bakah hian streaming platform lian Amazon leh Spotify-ah pawh a hla ngaithlatu hi an pung chak hle.

Tina hi thih dan pangngai, "natural cause" vanga thi niin a thupuangtute chuan an sawi, Kusnacht, Switzerland-ah a thi a ni.

Tina hian hun rei tak chhung taksa leh rilru lam natna a hmachhawn tawh thu kum 2021-a tihchhuah documentary-ah khan a sawi a, a pasal hlui Ike nen an inneih laia kut a tuarna leh sawisakna nghawng kal zel vangin 'post-traumatic stress disorder' a neih phah thute a sawi.

A pasal pahnihna, Erwin Bach nen an inneih aṭanga kum thumna, 2013 khan Tina hi a stroke a, intestinal cancer leh kal ṭha lo (kidney failure) natna te pawn a tlakbuak ṭhin a ni.

"Queen of Rock 'n' Roll" hian Grammy award pariat dawng tawhin, nomination 25 lai a hmu thei a ni. Lifetime Grammy Awards pathum dawng bawkin, kum 2009 khan Sheffield-ah a tour hnuhnung ber hi a nei a ni.