Science & Environment: Saudi hmeichhia zinga space mission-a kal hmasa ber Rayyanah Barnawi

Axiom Space chuan International Space Station (ISS)-a an private mission pahnihna chu naktuk hian Florida aṭangin an thlawhchhuahtir dawn a, hetah hian Saudi astronaut pahnihte chuan orbiting laboratory an tlawh dawn.

Breast cancer researcher, Rayyanah Barnawi chu Saudi hmeichhe zinga van thengrenga inkapchhuak hmasa ber a ni dawn a; Saudi mi vek fighter pilot, Ali Al-Qarni nen an kal ang. Anni pahnih bakah hian NASA astronaut Peggy Whitson chuan a vawi lina atan ISS hi a fang leh dawn a, Tennessee-a sumdawng John Shoffner chuan he space mission hi a kaihruai dawn a ni.

Axiom Mission 2 (Ax-2) crew-te hi Pathianni tlaiah Florida state chhim lam, Cape Canaveral-a Kennedy Space Center-ah SpaceX Falcon 9 rocket hmangin an thlawk chhuak dawn a, Thawhṭanni chhun dar 1 velah an tum ram hi thlengin, ISS-ah ni 10 chhung hun an hmang ang.

He mission hi van thengrenga Saudi Arabia mi an inkahchhuah vawi khatna a ni lo thung. Kum 1985 khan, air force pilot Prince Sultan bin Salman bin Abdulaziz chu US bultum space voyage-ah khan a lo kal tawh a ni.

Sum lama buai lo, oil ngah ram- Saudi Arabia ram hian tunhnai chhoah hmeichhiate chu lirthei khalh an phal chauh a ni a, Suadi hmeichhiate suangtuah phak loh chu a takah a thleng mek a ni.

Suadi chuan space mission-ah hmasawn zel a pawimawh zia hriain, 2018 khan Saudi Space Commission an din a, nikum khan van thengrenga astronaut tam zawk thawnna tur program an lo duang tawh bawk.

Zirchianna chu..

Member palite hian ISS-a an cham chhungin experiment chi 20 vel an kalpui dawn a, chung zingah chuan zero gravity-a stem cells khawsa zia an zirchiang ang. Axiom Space hian April 2022 khan an private astronaut mission hmasa ber Ax-1 an kalpui ṭan a, orbit-ah ni 17 chhung hun a hmang. Axiom hian anmahni pual space station siam tumin hma an la mek a, an module hmasa ber chu kum 2025-a tlangzarh hman an tum nghe nghe.

NASA-in ISS ruahsan dawn

NASA chuan kum 2030 bawr velah ISS hi rauhsan a tum thu an lo sawi tawh a, astronaut-te chu private stations-a kal turin thurawn a pe. Russa-in Ukraine a run avanga Russia leh khawthlang ram innghhirnghona kal mekah Russia chuan kum 2028 thleng ISS-a inbun hi a remtih thu an sawi. Japan, Canada leh European Space Agency-te pawhin United States ang bawkin kum 2030 thleng inbun an lo remti tawh bawk a ni.