Ruby Rose-in Batwoman a chang tawh dawn lo

Season khat an chang zo chauh tihah Ruby Rose chu Batwoman-ah a inlan tawh dawn lo tih Warner Brothers leh The CW chuan an tarlang.

Batwoman hi nikum October aṭang khan The CW chuan a pe chhuak ṭan a, Kate Kane/Batwoman lemah hian Ruby Rose hi changin season 1-ah hian episode 22 awm turin ruahmanna siam vek tawh mah se hripui lengin production a nghawng avangin episode 20 chiah a awm. 

Kumin January khan The CW chuan season 2 an siam leh dawn tih sawiin nakkum January-ah chuan tihchhuah hman an tum thu lo sawi tawh mah se Ruby Rose a chan dawn loh thu hi puanzar a ni leh ta si a, an chan chhunzawm dawn a nih chuan Bat­woman tur midang an zawn a ngai dawn ta a ni.

Kum 34 mi Ruby Rose chuan thuchhuah siamin season thara 'Batwoman' chang tawh lo tura thutlukna siam chu harsa a ti hle tih a sawi. "Awlsam takin thutlukna ka siam lo a, ka chanpui, crew leh midang Vancouver leh Los Angeles-a show-a inhnamhnawih zawng zawngte chu ka zah hle a ni," a ti.

Hetiang chanvo ṭha min pek mai piah lamah DC universe-a inlan theia min siam avang hian Greg Berlanti, Sarah Schechter leh Caroline Dries-te chungah ka lawm hle, tia sawiin Warner Bros. leh The CW chungah lawmthu a sawi bawk.

Ruby ban chhan hi chiang taka sawi a awm lo a, mahse season 1 thlirtu tam tak hian an sawisel nasa a, a ṭha tawk lo nia ngai pawh an tam hle. Hei hi a ban chhanah mi ṭhenkhat chuan ngai mah se nikum lam khan mi sawiselna chu engahmah a ngaih loh thu leh Batwoman lema chan chu a duhthusam a nih thu a lo sawi tawh thung.

Warner Brothers leh The CW hian Batwoman hi an la siam chhunzawm dawn tih an sawi a, Ruby Rose thlaktu tur pawh an zawng nghal dawn a ni.

"Warner Bros. Television, The CW leh Berlanti Productions chuan season 1 hlawh­tlin theihna atana nasa taka thawktu Ruby chungah lawmthu a sawi a, duhsakna sang ber a hlan bawk. Studio leh Network chuan Batwoman season 2 siam leh turin hma a la dawn a ni," tiin thuchhuah an siam.