Indian leh Asian zinga IG followers mtd 250 nei tling hmasa ber - Virat Kohli

Indian cricketer Virat Kohli chu Instagram-a India mi follower maktaduai 250 nei tling hmasa ber niin, India mai ni lo Asia khawmualpuiah heti zat follower nei hmasa ber a ni tel.

Kohli hian social media platform hi a hmang thiam hle. A hriselna, a mimal nun, training, match bakah a sumdawnna vawrhlarna atan a hmang ṭangkai ṭhin hle. Kum 34-a upa hi infiammi zingah follower neih tam lamah pathumna a ni mek a, a chungah hian footballer piang tawha azawnga a ber pahnih - Cristiano Ronaldo (586 million followers) leh Lionel Messi (464 million followers)-te chiah an awm.

Kohli hian Jennifer Lopez (245 million followers) lehpelin platform-a celebrity followers nei ngah lamah 13-naah a rawn inhlangkai a ni.

India captain hlui hi Indian Premier League (IPL) club Royal Challengers Bangalore (RCB) tan a khel mek a, season kallaiah pawh an player pawimawh tak niin a, tun season-a run siam tam pathumna a ni mek bawk.

Milar zinga follower ngah ber chu Selena Gomez niin, ani hian mtd 418 a nei mek a, hun rei tak chhung follower ngah ber ni ṭhin Kylie Jenner chuan follower mtd 391 neiin pahnihnaah a awm mek a ni.