Bullet For My Valentine-in album thar buaipui

'Tears Don't Fall' hitmaker Bullet For My Valentine frontman Matt Tuck chuan album thar an buaipui thu sawiin, kum 2018-a an tichhuah 'Gravity' album chhunzawmna tur tichhuak turin nasa takin an thawk mek tih a sawi.

Rock Sound hnenah Matt Tuck chuan hemi chungchang hi sawiin tun ang hian recording kan ṭan hmain material kan la nei ṭha ngai lo. Hla pasarih chu kan nei tawh a, a sak dan tur, demo engkim kan peihfel tawh a, record turin kan inpeih tawh a ni. Bul kan ṭan ṭha hle a ni, a ti.

Album thar record ṭan turin inpeih tawh hle mah se hripui leng vangin hna an chhunzawm thei rih lo tih a sawi a, ruahmanna pawh an nei thui hman hle tih a sawi bawk.

"Nikum lam kan thlir let chuan kumin hi chu hahchawlh kumah puan a, hla thar leh record thar buaipui pahah hmanhmawh lo taka hmalak kan tum a, thutlukna pawh kan siam fuh hle a ni," a ti.

Album thar tur chung­chang chu sawi zawmin 60% vel chu agressive vocals, 40% chu clean a ni dawn a, a heavy dawn hle tih leh technical tak a nih dawn thu a sawi. BFMV fan-te tan chuan a nghah­hlelhawm tawh hle ang.

BFMV hi kum 1998-a indin kha niin studio album paruk an tichhuak tawh a, an album hnuhnung pahnih 'Gravity' leh 'Venom'-a an thawhpui Carl Bown bawk an thawhpui leh dawn a, Matt pawh hi hei vang hian a phur tawh hle.