"Khawvela zirlai zir rei ber" Kum 54 hnuah a Graduate

Mi nawlpuiin kum hnih/thum vela kan zirchhuah mai theih kha ṭhenkhat tan chuan a lo ni hauh lo mai. University-a zawm aṭanga kum 54 zet a liam hnuah , kar liam ta Ningani khan Arthur Ross chuan kum 71 mi ni chungin University of British Columbia (UBC) aṭangin Bachelor of Arts degree chu a tawp a tawpah a dawng ve ta!

Kum 71 mi Ross hi kum 1969 khan UBC-ah hian a inziaklut a, tuna a larpuina pawh hi a zahpui lem loh thu sawizui bawkin, "In thawnthu headline tur chu 'UBC-a an zirlai muang ber a graduate ta' tih a ni tur a ni," tiin fiamthu thawhnan a inhmang zui.

UBC press release chuan, Ross hian English-ah degree neih a tum, mahse second year aṭangin theatre a tuina chuan a hringnun a luahlan a, a hun tam zawk chu theatre department-ah hian a hmang a, show-te neiin lemchanthiam nih tumin course dangte a zawm ta zawk a ni, a ti.

Ross hian UBC chhuahsanin, lemchan lama a tuina umzui turin Montreal-a National Theatre School chu a zawm leh a ni. Mahse a beisei angin thil a kal ta lo, lemchanthiam hlawhtling ni tura a beihna chu a hlawhchham a, beidawng takin a tawpsan zui a, "Actor ṭha tak chu ni mah i la, mi chungchuang bik nih a ngai tih ka theihngilh ngai lo a, ka tan a ṭha ber lo tih ka hrechhuak zui bawk," tiin a chawlhsan chhan a sawi. Lemchan a chawlhsan hnuah Toronto-a law school zawm lehin, a graduate hnuah Metro Vancouver-ah kum 35 chhung civil litigator hna thawkin kum 2016 khan a 'retire' a ni.

Ross hian November 2016 khan UBC hi bepawh lehin, student number thar an siam sak a, January 2017 a lo inherchhuah chuan history subject-ah part-time student angin a kal zawm leh a ni.